د پاکستان د اسلامي ایډیالوژي شورا مشر:
د ایران قدرت د امام خمیني (ره) پوروړی دی
پارس ټوډې - د پاکستان د اسلامي نظریاتي شورا مشر، د ایران د اسلامي جمهوریت د ستر بنسټ ایښودونکي امام خمیني (ره) ساده ژوند کول د نړۍ له واکمنانو سره د هغه د توپیر ځانګړتیا وګڼله او ویې ویل: د ایران د اسلامي جمهوریت د نن ورځې قدرت د امام خمیني (ره) د زړورې رهبرۍ پوروړی دی.
د پارس ټوډې د راپور له مخې، د پاکستان له مشهورو دیني مشرانو څخه راغب حسین نعیمي د دوشنبې په ورځ په اسلام آباد کې د ایرنا له خبریال سره د یوې ځانګړې مرکې په ترڅ کې، د اسلامي انقلاب د ستر بنسټ ایښودونکي امام خمیني (ره) ته په درناوي سره زیاته کړه: د دې ولسي او تاریخي مشر له عروج څخه ۳۶ کاله تېر شوي، خو د هغه ساده ژوند کول او د ژوند طریقه، د اسلامي نړۍ د مشرانو لپاره یو تلپاتې نمونه پاتې ده.
راغب حسین نعیمي، چې د پاکستان د اسلامي نظریاتي شورا مشر دی، ټینګار وکړ: بې له شکه، د ایران د نن ورځې عزت، ځواک او پرمختګ د امام خمیني (ره) پوروړی دی، او هغوی د ایران ملت ته د بصیرت او پوهاوي په ورکولو سره، دا قیمتي میراث پر ځای پریښود.
د پاکستان د اسلامي نظریاتي شورا مشر همدارنګه د مظلومو ملتونو په ځانګړي ډول د فلسطین په دفاع کې د امام خمیني (ره) د مهم رول په ستاینې سره وویل: د ارواښاد امام په تدبیر او راتلونکي لید سره د فلسطین موضوع نوی رنګ ځانته اخیستی دی.
