پاکستان: له ایران او امریکا سره ډیپلوماتیک چینلونه پرانیستي دي
په داسې حال کې چې په سیمه کې د ایران او متحده ایالاتو ترمنځ د کړکېچونو د مهارولو په موخه ډیپلوماتیک خوځښتونه روان دي، پاکستان یو ځل بیا د تاوتریخوالي د کمولو او د سیمهییز ثبات د پیاوړتیا په برخه کې پر خپل فعال رول ټینګار کړی دی.
د پاکستان د بهرنیو چارو وزارت ویاند«طاهر اندرابي» اعلان وکړ: دې هېواد لا هم له امریکا او د ایران له اسلامي جمهوریت سره خپل ارتباطي چینلونه پرانیستي ساتلي او د اوربند د ټینګښت په لور له هر ډول هڅو ملاتړ کوي.
طاهر اندرابي په خبري غونډه کې ټینګار وکړ: له ښکېلو لورو سره ډیپلوماتیک چینلونه لا هم فعال دي او اسلامآباد به په دې برخه کې خپل رغنده رول ته دوام ورکړي.
د پاکستان د بهرنیو چارو وزارت ویاند د اسلامآباد د سولې او سیمهییز ثبات پر ژمنتیا په ټینګار سره وویل: موږ هوډ لرو چې د تاوتریخوالي د کمولو لپاره له ټولو ډیپلوماتیکو ظرفیتونو څخه کار واخلو.
دا څرګندونې په داسې حال کې کېږي چې ځینې کارپوهان او پاکستاني رسنۍ د اسلامآباد په منځګړیتوب د پیغامونو د لېږد له لارې د غیرعلني خبرو د دوام خبر ورکوي.
د دغو سرچینو په وینا، د دې هڅو رسنیز نه کول د دې لپاره دي چې د ډیپلوماتیکو بهیرونو له ګډوډېدو مخنیوی وشي او د هوکړې د ترلاسه کولو چانس زیات شي.
په همدې تړاو، د پاکستان لومړي وزیر «شهباز شریف» هم پرون د ایران او امریکا ترمنځ د منځګړیتوب لپاره د خپل هېواد د هڅو د دوام په تایید سره، د اسلامآباد پر ارادې ټینګار کړی چې د تاوتریخوالي په کمولو او د سیمهییز ثبات په پیاوړتیا کې اغېزناک رول ولوبوي.
