عراقچي: سنتکام نه شي کولای خلک د تل لپاره وغولوي

پارس‌ټوډی ـ د ایران د بهرنیو چارو وزیر د امریکا د پوځ د مرکزي قوماندانۍ (سنتکام) له لوري د امریکا پوځ ته د اوښتو زیانونو د پټولو په غبرګون کې په یوه پیغام کې ولیکل: «تاسو نه شئ کولای خلک د تل لپاره وغولوئ.»

د صداوسیما خبري اژانس په حواله، د پارس‌ ټوډی د راپور له مخې، د ایران د بهرنیو چارو وزیر سیدعباس عراقچي په یوه پیغام کې ولیکل: «د مې په میاشت کې د امریکا د کانګرس څېړنیز خدمت ومنله چې د ایران وسله‌ والو ځواکونو د امریکا ۴۲ پوځي الوتکې له فعالیت څخه غورځولي دي، اوس دغه شمېر ۸۱ ته رسېدلی دی، واقعي شمېر تر دې ډېر زیات دی.»

عراقچي ولیکل: «دلیل یې څه دی؟ سنتکام اجازه نه ورکوي چې ان د امریکا د کانګرس یو سناتور هم له هغو اډو څخه لیدنه او د هغوی وضعیت وڅېړي چې سنتکام ادعا کوي، وضعیت یې په بشپړ ډول عادي دی.»

د ایران د بهرنیو چارو وزیر ټینګار وکړ: «تاسو نه شئ کولای خلک د تل لپاره وغولوئ.»

تر دې مخکې، د امریکا له کانګرس سره د یوې تړلې ادارې په یوه راپور کې ویل شوي وو چې لږ تر لږه ۸۱ امریکايي الوتکې، چورلکې او بې‌پیلوټه الوتکې د جګړې له پیل راهیسې، د شاوخوا اوو میاشتو په موده کې د ایران پر وړاندې د یرغلګرو بریدونو پر مهال له منځه تللې یا زیانمنې شوې دي؛ د دغو زیانونو لګښت ۳.۳ میلیارد ډالره اټکل شوی دی.

په روانه میاشت کې تازه شوی دغه راپور، چې د امریکا د کانګرس اړوند د څېړنې او عامه پالیسۍ د مرکز، یعنې د کانګرس د څېړنیز خدمت، له لوري خپور شوی، وايي چې د زیانمنو شویو امریکايي الوتکو، چورلکو او بې‌پیلوټه الوتکو شمېر ښايي د نویو معلوماتو له خپرېدو او تازه معلوماتو سره نور هم زیات شي.