پاکستان د افغان ولسمشر له څرګندونو د ناامیدۍ څرګندونه وکړه
د پاکستان د بهرنیو چارو وزارت د اسلام آباد په اړه د اشرف غنی څرګندونې ناامیده کوونکې وبللې.
زمونږ د رېډیو د رپوټ له مخې د پاکستان د بهرنیو چارو د وزرات ویاند د اشرف غنی د څرګندونو په غبرګون کښې وویل، افغان ولسمشر په دغه هېواد کښې د سولې د ټینګښت لپاره د پاکستان کوششونه هېر کړی دی.
نفیس زکریا په خپلو څرګندونو کښې وویل چې پاکستان په افغانستان کښې د سولې او ثبات لپاره په خپلو ژمنو پابند دے.
افغان ولسمشر په دې وروستیو کښې نوی ډیلی ته د سفر په وخت د هند له اېن ډی چېنل سره په مرکه کښې د پاکستان د نوم له اخېستو نه بغېر ویلی وو چې هغه کسان چې له ترهه ګرو او د خپل ګاونډی افغانسان په خلاف د هغوی له حملو ملاتړ کوی په آخر کښې به ګوښې ته شی.
افغان ولسمشر هند ته په خپل دوه ورځنی سفر کښې د دغه هېواد له لوړ رتبه چارواکو سره له ترهه ګرۍ سره د مبارزې اود امنیتی او اقتصادی ملګرتیاو په اړه خبرې اترې وکړې.په دغه سفر کښې هند له افغانستان سره د یو میلیارډ ډالرو مرستې وعده هم وکړه. پاکستان تل د کابل او نوی ډیلی له نزدیو تعلقاتو څخه اندېښنه څرګنده کړې ده. او له افغانستان سره د هند مرستې د ځان لپاره د خطر یوه ټالۍبولی.