له لس ساعته بندېدو وروسته د تورخم دروازه بیرته پرانیستل شوه

پاکستاني چارواکو د تورخم دروازه له پرون سهار راهیسې د مسافرو د تګ راتګ او ټرانزیټ پرمخ تړلې وه، چې وروسته له لس ساعتونو بیرته پرانیستل شوه.

د افغانستان د ننګرهار د والي ویاند عطاءالله خوګیاڼي رسنیو ته وویل چې د دواړو غاړو د خبرو په پایله کې د تورخم دروازه پرانیستل شوه.

خوګیاڼي زیاته کړه چې د خلکو زیاتې ګڼې ګوڼې له کبله لومړی یوازې د تګ راتګ اجازه ورکړل شوې چې وروسته به بار وړونکو او ترانریتي موټرو ته هم اجازه ورکړل شي.

د تورخم دروازه په داسې حال کې پاکستاني چارواکو تړلې وه چې د دوی په وینا پرې د افغان خاورې لخوا توغندي غورځول شوي دي.