افغانستان او پاکستان کښې د کرونا ځینې نور ناروغان څرګند شول
افغانستان کښې ۲۵۳ تنه نور په کرونا وایرس ککړ شوي دي.
د افغانستان روغتیا وزارت وویل چې د دغه ۲۵۳ کسانو په معلومیدو سره په هیواد کښې د کوویډ-۱۹ بیمارۍ د ناروغانو شمیر ۴۴ زره او ۱۷۷ کسانو ته رسیدلې دی.
د افغانستان د روغتیا وزارت د پروني اعلان له مخې په تیر شواروز کښې د پنځو نورو کسانو په مړینې سره په هیواد کښې د کرونا د قربانیانو شمیر ۱ زر او ۶۵۰ تنو ته رسیدلې دی.
د دغې وزارتخانې سرپرست وویل چې افغانستان د کرونا وایرس له دویمې څپې سره مخامخ شوی دی او رسمي احصائیې ښودنه کوي چې په هیواد کښې د کرونايي ناروغانو شمیر په زیاتیدو دی.
احمد جواد عثماني زیاته کړه، ټاکل شوې د ودونو تالارونه (شادي هالز) چې په افغانستان کښې د کرونا وایرس د خپریدو ستر لامل دی، بند کړی شي.
اخوا په پاکستان کښې هم د کرونايي ناروغانو د شمیر په زیاتیدو سره حکومت د ښوونځیو او شاپنګ سنټرونو د بندولو په شمول د لازیاتو محدودیتونو په لګولو غور کوي.
په تیر شواروز کښې په پاکستان کښې هم د ۲ زره ۵ سوه ۴۷ نویو ناروغانو په معلومیدو سره په دغه هیواد کښې په کرونا د ککړو کسانو شمیر ۳ لکه ۶۵ زره او ۹۲۷ تنو ته ورسید.
