په نابلس ښار کی یو فلسطیني ځوان په شهادت رسېدلی
یو فلسطیني ځوان د اردن سیند په لوېدیځه غاړه کې د نابلس په ښار کې د صهیونیستیانو د ډزو او د سختو ټپونو له امله شهید شو.
د فلسطین الیوم خبري سایټ د راپور له مخې، د نابلس ښار اوسیدونکی ځوان فلسطینی ځوان«عمیر لوله» د روان کال د فبرورۍ په ۲۲م نېټه په دغه ښار باندې د اسرائیلي نیواکګرو ځواکونو په برید کې په ډزو سره ژوبل شوی وو چې نن د سختو ټپونو له امله په شهادت ورسېد.
له بل لوري، د دوشنبې په ماښام د «عقبه جبر» پر کمپ باندې د صهیونیستي پوځیانو د وسله وال برید له امله، شپږ فلسطینیان ژوبل او دوه تنه نور ونیول شول. په دغه برید کې اسرائیلي پوځیانو پر فلسطینیانو او د هغوی پر کورونو ګولۍ او زهرجن ګاز وشیندل.
د اریحا د روغتون مشر ناصر عناني ویلي دي چې د عقبه جبر پرکمپ باندې د اسرائیلي ځواکونو د برید په ترڅ کې د یوه ماشوم په ګډون څلور تنه فلسطینیان د جنګي مرمۍ او یو شمیر نور د ربړي د فلزي مرمۍ له امله ټپیان شوي دي.
