د نتانیاهو د ائتلافي کابینې د سقوط احتمال پیاوړی کېږي
پارس ټوډی – یوه عبري ژبې ورځپاڼې د دوشنبې په ورځ د صهیونیستي رژیم د لومړي وزیر بنیامین نتانیاهو، د ائتلافي کابینې د سقوط احتمال ته اشاره وکړه چې د داخلي اختلافاتو د شدت له امله رامنځته شوی.
د «معاریو» ورځپاڼې لیکلي: د نتانیاهو د کابینې پرېکړه چې په محدودو ساعتونو کې د غزې لپاره د بشري مرستو د قطرې په څېر ننوتلو اجازه ورکړي، د نړیوالې ټولنې د سخت فشار لاندې او د صهیونیستي رژیم د خراب شوي تصویر د ښه کولو په موخه، د نتانیاهو د ائتلافي شریکانو د مالیې وزیر بتسلئیل اسموتریچ ، او د داخلي امنیت وزیر، ایتمار بن ګویر، غوسه راپارولې ده.
دې اسرائیلي ورځپاڼې لیکلي، اسموتریچ اعلان کړی چې د هغه ګوند به د کابینې د راتلونکي په اړه د سمدستي سیاسي مشورو ترسره کولو ته لاس پورې کړي.
هغه همدارنګه د نتانیاهو د فعالیت په وړاندې د اعتماد د بحران شتون ته اشاره کړې ده.
د بن ګویر اړوند ګوند هم د نتانیاهو په ائتلاف کې د دوام په اړه مشورې کوي. د «معاریو» ورځپاڼې زیاته کړې چې د ښي اړخې جبهې د سقوط نښې په روښانه توګه څرګندې شوې دي.
د صهیونیستي رژیم په حاکم ائتلاف کې درز یو نوی شی نه دی، خو د بن ګویر او اسموتریچ اړوند کوم ګوند چې ووځي، کیدای شي د ائتلافي اکثریت د نه ترلاسه کولو له امله د نتانیاهو کابینه سقوط کړي.