دسوریې پوځ د درعا ۵۸ فیصده سیمې ازادې کړی دی

ایرنا خبری اژانس وایی دسوریې دبشری حقوقو څارونکی موسسې وویل ددغه هیواد پوځ او وسله والو ځواکونو له څو ورځې عملیاتو وروسته په درعا ولایت کښې د اته پنځوس (۵۸)فیصده سیمو کنټرول په لاس کښې واخیست .

دسوریې دحکومت مخالفانو ته اړونده د بشری حقوقو څارونکی موسسې پرون په خپل نوی راپور کښې اعتراف وکړ حکومتی عسکرو د درعا ولایت په ختیځو او لویدیځو برخو کښې پراخ پرمختګونه کړی دی او پرون سهار بریالی شول د اردن په سرحد کښې د« نصیب» سرحدی لارې اوه(۷) کلومیټرۍ ته ورسیږی .

ترهګرو ته نږدې سرچینو هم پرون په درعا ولایت کښې د سوریې دپوځ په عملیاتو کښې د دوه اتیا(۸۲) ټروریسټانو د هلاک کیدا خبر ورکړ .

دسوریې پوځ له تیرو څو ورځو راهسې تر پرون پورې د درعا ولایت د پاکولو د عملیاتو په پیلولو سره ترهګرو ډلو ته په ماتی ورکولو سره څه دپاسه پینځه شپیته(۶۵) ښارګی او کلی ازاد کړی دی او د دغه ولایت د ختیځ څه دپاسه اویا(۷۰) فیصده خاوره یې له ترهګرو پاکه کړی ده او هغه یې په لاس کښې اخیستی ده .

دغه راز په تیرو څو ورځو کښې د پوځ د بمباریو له کبله دباونو او ددغو سیمو حالاتو ته په پام سره څه دپاسه یوزر او یوسل پنځوسو(۱۱۵۰) ترهګرو په دوو(۲) ډلو کښې ځانونه  دسوریې پوځ ته تسلیم کړی دی .

دسوریې په ریف دمشق ولایت  کښې دغوطه شرقی او دغوطه غربی د نیواکی سیمو له ازادیدا وروسته اوس دټولو خلکو سترګې درعا ولایت ته اوښتی دی کوم چې د سوریې په جنوب کښې  د اردن سرحد او دسوریې د جولان نیواکی لوړو ته نږدې پروت دی .

په سوریې کښې جنګ له ۲۰۱۱ میلادی کال راهسې د امریکا  ، سعودی عربستان او دهغوې د نورو ملګرو د ملاتړ وړ ترهګرو ډلو په پراخو یرغلونو سره دصهیونیسټ رژیم په ګټه دسیمې دمعادلاتو لپاره پیل شوی خو ترهګرو اوس سخته ماتی خوړلی ده .