اوکراین ته د وسلو استول د جنګ د اوږدیدا سبب ګرځي
زمونږ خبریال وايي د روسیې د ولسي جرګې دوما مشر ویچسلاو والودین وویل اوکراین ته د وسلو استول په دغه هیواد کښې د جنګ د نور زیاتیدا او د غمیزې په لور د نړۍ د کاږل کیدا سبب ګرځي .
هغه وویل هغه هیوادونه چې اوکراین ته وسلې استوي د دغه جنګ د اوږدیدا سبب دي .
د روسیې د ولسي جرګې مشر ویچسلاو والودین وویل د اروپايي هیوادونو مشران چې په سر کښې یې جرمني هیواد دی ممکنه ده چې خپل ملتونه د سختو مشکلاتو په لور بوځي .
د جرمني پارلمان په اوکراین کښې د جنګ په پلمه دغه هیواد ته د وسلو له استولو سره موافقت وکړ .
روسیې په رسمي ډول امریکا او نورو هیوادونو ته خبرداری ورکړی دی د پوځي مرستې په ورکولو سره له اوکراین ملاتړ به په دغه هیواد کښې د جنګ د اوږدیدا سبب شي او حتی د نه اټکل وړ پایلې به ولري .
د امریکا ولسمشر جوبایډن له ولسي کانګرس غوښتي دي چې په راتلونکو پینځو (۵)میاشتو کښې له اوکراین د ملاتړ په هدف سره درې دیرش (۳۳) میلیارډه ډالره پوځي ، اقتصادي او بشردوستانه مرستې تصویب کړي .
