د تاجکستان او افغانستان د ترهګریزو ډلو تر منځ اړیکې
د تاجکستان چارواکي د تاجکستان او افغانستان د ترهګریزو ډلو ترمنځ د اړیکو او همکارۍ پخلی وکړ.
د ایرنا د خبر له مخې، د تاجکستان د بهرنیو چارو د وزارت د ستراتیژیکو مطالعاتو مشر وویل چې په «بدخشان» سیمه کې ترهګرې ډلې په افغانستان کې له ترهګرو ډلو سره ارتباط لري.
شرف رحیمي زیاته کړه، دا مهال د خپل هېواد له پولو سره په افغانستان کې د ترهګرو ډلو د فعالیتونو پایلې احساسوو.
دغه تاجک څېړونکي له افغانستان سره په پوله کې د تاجکستان د امنيتي ځواکونو له خوا د ترهګریزو ډلو د يو شمېر غړو نيولو ته په اشارې سره څرګنده کړه، چې دغه نيول کېدل په بدخشان کې د ترهګیزو ډلو او په افغانستان کې د ترهګرو او نشه يي توکو د جنايتکارانو ترمنځ د نږدې اړيکو څرګندونه کوي .
رحيمي په افغانستان کې د فعالو ترهګرو له خوا د نويو لارو چارو تازه کول او اختراع کول تائيد کړل او ويې ويل: "ترهګریز عناصر د خپلو مهماتو په ډيپوګانو کې په زياته اندازه سپکې او درنې وسلې او پوځي تجهيزات لري."
د طالبانو ویاند ذبیح الله مجاهد د تاجکستان د چارواکو د اندېښنو په ځواب کې ویلي چې د تاجکستان اندېښنې بې بنسټه دي.
د یادولو وړ ده چې د داعش لخوا د افغانستان له خاوره څخه د دې هېواد پر ګاونډیانو څو ترهګریز بریدونه، د تاجکستان په څېر هېوادونو سره د ژمنو د پوره کولو لپاره د طالبانو وړتیا تر پوښتنې لاندې راولي.
