سنگاپور: د فلسطین دولت په رسمیت پېژندلو ته چمتو یو
پارس ټوډی - د ملګرو ملتونو په سازمان کې د فلسطین د یوه خپلواک دولت د جوړولو د طرحې د پرمختګ لپاره د هڅو په ترڅ کې، سنگاپور د چهارشنبې په ورځ اعلان وکړ چې د فلسطین دولت په رسمیت پېژندلو ته چمتو دی.
د سنگاپور استازي کوین چیوک د ملګرو ملتونو په یوه لوړپوړې غونډه کې وویل: د دوی هېواد د فلسطین دولت په رسمیت پېژندلو ته چمتو دی او کلیدي ټکی دا دی چې دا اقدام باید د سولې په لور پرمختګ سره مرسته وکړي.
چیوک په نیویارک کې د ملګرو ملتونو په یوه کنفرانس کې وویل: سنگاپور د غزې د ناروغانو د درملنې لپاره د یوې طبي ډلې د لېږلو په اړه هم غور کوي.
د سنگاپور استازي زیاته کړه چې په اوږدمهال کې، سنگاپور چمتو دی چې د تلپاتې اوربند له ترلاسه کولو وروسته د غزې په بیا رغونه کې برخه واخلي.
هغه وویل: دا هېواد تل د فلسطینیانو د خپلې خاورې د حق غوښتنې ملاتړ کړی، چې د ملګرو ملتونو د امنیت شورا د اړوندو پرېکړو سره سم دی.
د ملګرو ملتونو درې ورځنی کنفرانس چې د منځني ختیځ د سولې د حل لارې د پلي کولو په اړه و، پرون چهارشنبه پای ته ورسید.
