بغداد د امریکا د نوو بندیزونو له امله خواشیني څرګنده کړه
د عراق حکومت د امریکا له خوا د "المهندس" شرکت او د دې هېواد د څو تنو اتباعو پر وړاندې د بندیزونو د لګولو له پرېکړې څخه خواشیني څرګنده کړه.
د عراق د حکومت ویاند باسم العوادي په یوه رسمي بیان کې وویل چې دا اقدامات "یو اړخیز او ډېر خواشینوونکي" دي.
العوادي زیاته کړه چې دا پرېکړې "د دواړو هېوادونو ترمنځ د اړیکو د دوستۍ او متقابل احترام له روحیې سره په ټکر کې دي" او ټینګار یې وکړ چې عراق سره د دې اقدام د ترسره کېدو دمخه مشوره نه ده شوې.
د عراق د حکومت ویاند ټینګار وکړ چې بغداد هر هغه اقتصادي فعالیت ردوي چې د قانوني چوکاټ څخه بهر وي.
العوادي د دې قضیې د څېړنې لپاره د یوې لوړې ملي کمیټې د جوړولو اعلان وکړ چې د مالیې وزارت، د محاسبې دیوان، د فساد پر وړاندې د مبارزې ادارې او د عراق مرکزي بانک استازي به پکې شامل وي.
د هغه په وینا، دا کمیټه به په ۳۰ ورځو کې خپلې وړاندیزونه وړاندې کړي.
دا په داسې حال کې ده چې د امریکا د خزانې وزارت ادعا کړې چې دا بندیزونه د "ایران تر ملاتړ لاندې ډلو" پر وړاندې دي، چې د دې ادارې په ادعا، د امریکايي اتباعو د وژلو، د عراق د حکومت د کمزوري کولو او د نفوذ له ناوړه ګټې اخیستنې مسوول دي.
د هدف شوو ادارو او اشخاصو په منځ کې د "المهندس" عمومي شرکت او "کتائب حزبالله" نومونه دي چې د عراق د رسمي ځواکونو په جوړښت کې مدغم شوي دي.
همدارنګه، د عراق د ملي المپیک کمیټې رئیس عقیل مفتن او د هغه ورور علي هم د ایران په ګټه د پیسو مینځلو په تور د دې بندیزونو تر پوښښ لاندې راغلي دي.
د امریکا د خزانې وزارت ویلي چې د دې بندیزونو موخه د هغو مالي شبکو ګډوډول دی چې د دې ډلو فعالیتونه ممکنوي.
دا وزارت همدارنګه ادعا کړې چې دا اقدام "د امریکايي اتباعو د ژوند خوندیتوب او د ملي امنیت د تامین" لپاره "اړین" دی.
