د ایران پنځهګونې تګلارې څنګه وروستي ترهګریز اقدامات شنډ کړل؟
پارسټوډې – په داسې حال کې چې ډونالډ ټرمپ د اسلامي جمهوریت پر وړاندې له خپلو ګواښونو شاته شو، تهران هم د پنځو تګلارو په خپلولو سره، له وروستیو ترهګریزو اقداماتو څخه د بهرنیو لورو د ګټې اخیستنې هڅې بېاغېزې کړې.
د پارسټوډې د راپور له مخې، د سپینې ماڼۍ پالیسي جوړوونکي دې پایلې ته رسېدلي چې له ایران سره مستقیم پوځي تقابل یو ډېر خطرناک او نهاټکل کېدونکی اقدام دی؛ تر دې چې ځینو امریکايي ستراتېژیستانو هغه له عملیاتي پلوه ناممکن بللی دی.
د دې راپور پر بنسټ، پر ایران هر ډول پراخ برید کولای شي د فارس خلیج او سره سمندرګي کې د تېلو او ګازو د بهیر د بندېدو لامل شي؛ هغه پېښه چې پایلې به یې د نړیوال اقتصاد ړنګېدل او صهیونیسټي رژیم ته جدي زیانونه وي.
المیادین لیکي، حتی که د ایران پوځي او استخباراتي وړتیاوې هم له پامه وغورځول شي، هر ډول د نفوذ هڅه به د اسلامي جمهوریت د میلیونونو کورنیو پلویانو له پراخ غبرګون سره مخ شي؛ داسې ظرفيت چې د هوايي بریدونو یا ځمکنيو عملیاتو له لارې بېاغېزې کېدلای نه شي.
په داسې شرایطو کې، د ایران پر ضد د «ویجاړوونکي ګوزار» انتخاب عملاً د تحقق وړ نه دی، او د امریکا تر ټولو زیات ممکن اقدام په رسنیز کارندوالي سره محدود بریدونه دي چې په میداني توازن کې به هېڅ اغېز ونه لري.
دا راپور همدارنګه د ایران د ګاونډیو هېوادونو، په ځانګړي ډول د هغو عربي دولتونو اندېښنو ته اشاره کوي چې د تېلو پر صادراتو ولاړ دي؛ هغه هېوادونه چې پوهېږي په سیمه کې هر ډول جګړه به د دوی اقتصادي بنسټونه له جدي خطر سره مخ کړي.
له بلې خوا، صهیونیسټي رژیم له ایران سره د ۱۲ ورځنۍ جګړې تر تجربې وروسته دې پایلې ته رسېدلی چې د هغه کورنۍ جبهه د یوې پراخې جګړې د پایلو د زغملو توان نه لري. پر همدې بنسټ، امریکا هڅه کوي د اقتصادي فشارونو د زیاتولو او د مخالفو ډلو د ملاتړ له لارې د ایران ټولنیز جوړښت کمزوری کړي.
د بهرنۍ توطئې پر وړاندې د تهران تګلارې
د المیادین د لیکنې له مخې، ایران په وروستیو بدلونونو کې د پنځو محورونو پر بنسټ وتوانېد چې رامنځته شوی مرکب کړکېچ اداره او د امریکا هڅې ناکامې کړي:
۱. د اقتصادي او ټولنیز وضعیت مهار
د مالي ملاتړونو د پلي کېدو، د تورمزیږو مصوبو د لغوه کولو او د بیو د کنټرول له لارې، د اقتصادي نارضایتۍ یوه برخه راکمه شوه او د ګډوډیو د پارونې یو عامل له منځه ولاړ.
۲. د معترضانو او ګډوډوونکو بېلول
حاکمیت د خلکو د مشروع غوښتنو او پلان شویو تاوتریخوالو ترمنځ توپیر وکړ او د اعتراض لاره یې له بلوا څخه جلا کړه.
۳. عقلاني او کنټرولشوی امنیتي مدیریت
امنیتي ځواکونو له پراخ تاوتریخوالي ډډه وکړه، تر څو د وینو تویېدو له شخړو څخه بهرنیو لورو ته د ناوړه ګټې اخیستنې زمینه برابره نه شي.
۴. هدفمند استخباراتي اقدامات
د ګډوډیو د پلانوونکو شبکو څارنه او پېژندنه په دقت سره روانه وساتل شوه، څو دا ډلې ونه شي کولای په تکراري بڼو بدلې شي.
۵. د کورني یووالي پیاوړتیا
د ټولنیز یووالي ساتنه د سیاسي او ولسي درزونو د رامنځته کېدو مخه ونیوله او په هېواد کې د اوږدمهاله هرجومرج د رامنځته کولو هڅې یې شنډې کړې.
