مسکو په امریکې باندې نوې بندیزونه ولګول
د روسیې د بهرنیو چارو وزیر اعلان وکړ چي مسکو به د امریکې په ۸ چارواکو باندې بندیزونه ولګوي او ۱۰ تنه امریکایي ډیپلوماټان هم له روسیې څخه وباسي.
سرګئي لاوروف اعلان وکړ چي مسکو د امریکې وروستیو ناسمو اقداماتو او بندیزونو ته په غبرګون کې به ۱۰ تنه امریکایي ډیپلوماټان له روسیې څخه وباسي او د امریکې په ۸ چارواکو باندې بندیزونه ولګوي.
د روسیې د بهرنیو چارو وزیر زیاته کړه: کرملین د امریکې له سفیر څخه غوښتنه کړې چي د خپل هیواد سره د سلامشورو لپاره له مسکو څخه ولاړ شي.
لاوروف ټینګار وکړ چي له دې ټولو سره سره هیواد یې د بایډن او د پوټین د احتمالي خبرو اترو ټول اړخونه څیړي او دغه کار ته په مثبت نظر ګوري.
د امریکې حکومت د دې هیواد په ټاکنو کې د لاسوهنو په تور ۳۲ روسي چارواکو او شرکتونو باندې نوې بندیزونه ولګول چي د ټکنالوجیو په زمینه کې فعالي روسي کمپنۍ هم په کښې شاملي دي.
