Ministri i Jashtëm i Iranit: Irani dhe Turqia rezervojnë të drejtën për një “mbrojtje legjitime kundër çdo akti terrorist”
Ministri i Jashtëm i Iranit, Hossein Amir-Abdollahian, ka thënë se prania e regjimit izraelit në rajonin e Kaukazit është ndër çështjet e rëndësishme me të cilat përballet rajoni.
“Irani paralajmëron të gjitha palët që të jenë vigjilente për Izraelin dhe të mos lejojnë praninë e Izraelit në Kaukaz”, tha të mërkurën Amir-Abdollahian ndërsa fliste në një konferencë të përbashkët shtypi me homologun e tij turk, Mevlut Cavusoglu, në Ankara. Ai tha gjithashtu se terrorizmi me origjinë nga rajoni verior i Irakut është një kërcënim i përbashkët për Iranin dhe Turqinë. Amir-Abdollahian tha se Irani dhe Turqia gëzojnë një nivel të lartë bashkëpunimi të sigurisë në lidhje me luftën kundër terrorizmit. “Terrorizmi me origjinë nga rajoni i Kurdistanit të Irakut, si dhe terrorizmi i ISIS-it që buron nga Afganistani janë ndër shqetësimet tona të përbashkëta”, tha ai. “Ne besojmë se terrorizmi nuk është i mirë apo i keq, por një fenomen ogurzi në çdo maskë dhe formë.” Ministri i Jashtëm i Iranit më pas bëri të qartë se brenda kornizës së ligjit ndërkombëtar, Irani dhe Turqia rezervojnë të drejtën për një “mbrojtje legjitime kundër çdo akti terrorist” nga çdo drejtim dhe nga çdo grup. Më tej në fjalë e tij, Amir-Abdollahian tha se Irani mbështet rivendosjen e marrëdhënieve midis Turqisë dhe Sirisë. “Ne mirëpresim rikthimin e marrëdhënieve Turqi-Siri. Ne ishim të interesuar të punonim për të zgjidhur keqkuptimet midis Sirisë dhe Turqisë dhe e mirëpresim pjesëmarrjen në çdo format katërpalësh.” Ministri i Jashtëm turk Mevlut Cavusoglu, nga ana e tij, shpjegoi se Amir-Abdollahian dëshironte të bashkohej në bisedimet trepalëshe midis Turqisë, Rusisë dhe Sirisë, të cilat u mbajtën dy muaj më parë, dhe se Ankaraja e pranoi me kënaqësi këtë kërkesë. Zëvendësministrat e jashtëm të Turqisë, Rusisë, Sirisë dhe Iranit do të takohen në Moskë javën e ardhshme përpara bisedimeve të planifikuara midis ministrave të jashtëm. Ndërkohë, Amir-Abdollahian tha se Çavusoglu së shpejti do të vizitojë Teheranin dhe se janë bërë konsultime për udhëtimin e Presidentit iranian në Turqi. Ministri i Jashtëm iranian mbërriti në Turqinë fqinje më herët gjatë ditës "për të shprehur simpatinë me qeverinë dhe popullin turk" për tërmetin shkatërrues të muajit të kaluar.
