Irani në GJND kërkon përfundimin e menjëhershëm të krimeve të Izraelit kundër palestinezëve
Zëvendësministri i Jashtëm i Iranit për Çështjet Ligjore dhe Ndërkombëtare Reza Naxhafi tha se krimet e Izraelit kundër palestinezëve duhet të ndalen menjëherë.
Naxhafi lexoi deklaratën e Iranit të enjten gjatë procedurave verbale në Gjykatën Ndërkombëtare të Drejtësisë mbi pasojat ligjore të pushtimit të territoreve palestineze nga Izraeli.
Duke vënë në dukje qëndrimin e kahershëm parimor të Iranit për realizimin e plotë të së drejtës së palestinezëve për vetëvendosje dhe për mosnjohjen e Izraelit, përfaqësuesi iranian nënvizoi situatën katastrofike në Rripin e Gazës, duke cituar raporte nga organizatat ndërkombëtare dhe nga agjencitë e ndihmës.
Përfaqësuesi iranian shprehu shpresën se gjykata, me mendimin e saj të drejtë, do të siguronte bazën që do të ndihmonte në shpëtimin e jetëve të mijëra grave dhe fëmijëve të pafajshëm në të gjithë territoret e pushtuara palestineze.
“Ne mbetemi në një pikë kthese në historinë e njerëzimit; opinioni i kësaj Gjykate mund të krijojë bazën për shpëtimin e jetëve të mijëra grave dhe fëmijëve të pafajshëm dhe të kontribuojë në kërkesën legjitime të një populli të privuar për dekada nga e drejta e tij e natyrshme për vetëvendosje”, tha Zëvendësministri i Jashtëm i Iranit për Çështjet Ligjore dhe Ndërkombëtare.
“Është e panevojshme të thuhet se zhvendosja e dhunshme e popullatës civile është e një rëndësie kaq të lartë sa që është përcaktuar si krim lufte sipas nenit 8 të Statutit të Gjykatës Penale Ndërkombëtare”.
Më tej në deklaratë, gjykatës së lartë të OKB-së iu tha se mbajtja e një referendumi kombëtar është e vetmja mënyrë ligjore dhe demokratike për të përcaktuar fatin e palestinezëve.
“Sipas pikëpamjes së Republikës Islamike të Iranit, e vetmja metodë ligjore, praktike, demokratike dhe e drejtë për të realizuar efektivisht të drejtën e natyrshme për vetëvendosje të popullit palestinez është mbajtja e një referendumi kombëtar në Palestinë. Detajet e këtij plani përmbahen në një dokument zyrtar të Kombeve të Bashkuara të publikuar në vitin 2019", shtoi përfaqësuesi iranian.
