Zbulohet një tjetër varr masiv në Gaza
Punonjësit shëndetësorë në Gazën veriore kanë nxjerrë më shumë trupa nga një tjetër varr masiv në spitalin Shifa, raporton zyra e mediave në Gaza, duke thënë se kishte edhe trupa pa koka.
Zyra qeveritare e mediave tha të mërkurën se ekipet mjekësore palestineze deri më tani kanë nxjerrë 49 trupa nga varri masiv dhe ende janë duke u zhvilluar përpjekje për të kërkuar më shumë.
"Ne gjetëm trupa pa koka në këtë varr masiv në spitalin Shifa," citoi Al Jazeera një burim në Ministrinë e Shëndetësisë në Gaza.
Pamjet e publikuara nga spitali Shifa treguan të paktën një duzinë trupash të mbështjellë me qese të zeza plastike.
Ky ishte varri i tretë masiv që u zbulua brenda spitalit, sipas Motassem Salah, kreu i departamentit të urgjencës në spitalin Shifa.
