Luftimet vazhdojnë në Khartum ndërsa ndërmjetësit sudanezë kërkojnë t'i jepet fund krizës
Forcat rivale sudaneze kanë vazhduar luftimet në Khartum ndërsa ndërmjetësit e palëve ndërluftuese në Sudan po takohen në Arabinë Saudite, duke kërkuar t'i jepet fund përleshjeve të dhunshme.
Luftimet vazhduan të dielën midis ushtrisë sudaneze dhe Forcave të Mbështetjes së Shpejtë (RSF) teksa përfaqësuesit e liderëve ushtarakë rivalë të vendit filluan bisedimet për t'i dhënë fund konfliktit trejavor që ka lënë qindra njerëz të vdekur dhe shumë të tjerë të plagosur, duke e zhytur vendin afrikan në kaos dhe duke shkaktuar një eksod masiv. Raportet nga Sudani thanë se zhurmat e avionëve luftarakë dhe shpërthimet mund të dëgjoheshin gjatë natës ndërsa luftimet vazhdonin në jug të Khartumit dhe përtej Nilit. “RSF u përpoq të sulmonte komandën e Forcave të Mbrojtjes Ajrore në Khartum, por Forcat e Armatosura të Sudanit zmbrapsën sulmin, shkatërruan disa automjete të armikut dhe kapën tre automjete luftarake”, tha në një deklaratë ushtria sudaneze. Gjithashtu, Forcat Ajrore të Sudanit vazhduan sulmet ajrore në pozicionet e RSF-së, të cilave forcat e milicisë iu përgjigjën me armë kundërajrore. Përleshjet në Sudan vazhdojnë pavarësisht armëpushimit të shpallur, teksa bisedimet e paqes janë duke u zhvilluar në Arabinë Saudite. Forcat e RSF, të cilat janë të vendosura në Pallatin Republikan në Khartum, filluan një ofensivë ndaj komandës së Forcave Ajrore të vendit, e cila kryen sulme të shpeshta në pozicionet e RSF.
