İroni xarıci vəzir Muhəmməd Cəvad Zərif zinə şəv Bukoədə de Azərbaycan Respublika prezident vindemon ijən muxalifə 2 tərəfi və məntəğəiyə mıvzoon barədə suhbətış kardə.

Bə İrna raporti əsos Zərif ım mıloğati bəpeştə jurnaliston cəmədə dəvardə 4 sori mıddətdə bə İron və Azərbaycan Respublika prezidenton miyono didoron işorəş kardə ijən votışe: ım miğdor vindımon nışo dodə ki İron və Azərbaycan Respublika 2 qılə bıvə iyən hamsuyə dustə kişvərin.

Çı İroni xarıci vəziri ım səfəri barədə İroni xarıci vəzarətxanə sıxənəvot Bəhram Ğasımi həm bə ım səfəri əhəmmiyət işorəş kardə ki karde bəzne bə məntəğə stabiləti və əmniyyəti aid bıbu.

Ğeyd kəmon ki Muhəmməd Cəvad Zərif Bukoədə çı İron, Tırkiyə və Azərbaycan Respublika 3 tərəfiyə məxsusə iclosədə iştirok kardero bə ım kişvər səfərış kardə.

İroni xarıci vəzarətxanə sıxənəvot ijən bə ımrujnə iclosi cərəyonədə muxtəlifə siyasi və iğtisodi mıvzoon barde sohbət karde işorəş kardə və de təkid karde bə sulhinə votımonon votışe: ımrujnə iclosədə nəğliyat, tranzit, enerji, komrok və muxtəlifə ticari və texnikiyə mıvzoon barde muzakirə bəbe.

İroni xarıci vəzir Ağaye Zərif ijən zinə şəv çı İronıjon cəmədə bə İroni milləti zərfiyət iyən xususiyəton işorəş kardə və votışe: İronıjon har vırədə ki bıbun bənə kolim iyən muvəffəğə zınə şəxson çı İroni mədəniyyəti nımoyəndəoninş

Bukoədə İroni səfir Cəvad Cəhanqirzade həm de ım səfəri həmzəman Azərbaycan Respublikadə bə dəvardə 20 sori mıddətdə İronıjə invıstoron 2 milyard dollariyə sərmoyə noe işorəş kardə ijən votışe: Azərbaycan Respublikaədə detosə bə ısət 450 qılə İronıjə şirkət bino bıə ijən bə 2500 nəfər nezi tələbə unniversitionə ijən ım kişvərədə bə dərs hande məşğulin.

Ğeyd kəmon ki İron, Tırkiyə və Azərbaycan Respublika miyono 3 tərəfiyə həmkari iclos 5 minə kərəe ki dəvardə 5 sori mıddətdə kişvəron xarıci vəziron iştirok karde vasitə əncom bedə.