Nəvuzə idi problemon

Az.Respublika iğtisadiyyatədə behrani dəvom karde, əhali quzərani səviyyə sorbəsor bə saru eqınie səbəb bedə. Imsornə Nəvizə idi dəvunie roədə sodə şəhrıvandon de xeyli problemon vəbəvə mandən.

Paytaxt Bokuədə çe Respublika əyalətono xeyli odəm jimon kardedə. Əvon iyo bo ko karde, bo hande ro omən. Har idə tədbironədə ıştə valideynon ziyarət kardero bə vətən oqardedən. "Unikal.org" sayt Boku Beynəlxalqə Avtovağzalədə avtobuson nırəse səbəbiku hətto bilet hıriə sərnişinon bəştə məntəğə dəro qınieədə mışğılon bə əməl ome həxədə nıvıştəşe. Sərnişinonədə qıley bə muxbiri votəşe ki, maştə saat 6-i bə Lankon dəro qıniə reysi bilet səşe, əmo 2 saate ki, avtobus ni. Həmən idi ərəfədə tələbati ziyod bıe səbəb bedə ki, bileton ğıyməti ğeyri-rəsmi 2-3 mənot boho kardedən. Avtovağzali rəsmi koəkə ım iddia təkzib kardəşe.

Nəvuzə idi mışğıl Şamaxi rayoni Ovçulu diədə bə faciə səbəb bıə. 23 sınninə Alıyev Muzadil bəpe bəştə pəvəndi kə İdə xonçə bəbey. Bımi ro maddi imkanış nıbe səbəbiku bəştə ğəsd kardəşe. 

Binəqədi rayoni Muhafizə idarə polison bə çəvon manqə məvacibi vaxtədə nıdoe etiraz kardəşone. Mənbə bə "Azadlıq.info" məlumat doəşe ki, har manqi 20-ədə çəvon məvacibon əden. Isət 2 manqe ki, ımi bə di dəğandedən. Bəmənən boştə xeyzoni idə xarci karde lozime. Əmo məvacibi bə di dəğande səbəbiku tosə ısət bo idi hiç qıley tədarük vinde zınəmon ni. Marti 20-ku məmləkətədə 7 rujnə idə tətil bino bıe səbəbiku ım idarə polison ıştə məvacibon çe idi bəpeştə bəsənen.