Çe Əliyevi Əfv sərəncomi cəmiyyəti etimad təsdığ nıkardışe
De Azərbaycanə Cumhuriyyəti 100 sornə idəqardışi əlağədar İlham Əliyevi 634 nəfər məhkumi əfv karde barədə bə sərəncomi imza noşe.
Respublika cəmiyyət ım sərəncomi cəş kardedəbe və vey yolə etimadış hestbe ki, məmləkəti zindononədə 160 nəfər siyasiə məhbuson hestin, çəvon 100 nəfərisən vey dini xadimon və fəalonin, hokumət çəvonədə xeyli ğismi azad bəkarde ki, həm keşvəri daxilədə, həmən beynəlxalğə aləmədə ıştə imici ros bıko.
Ğərəboği islami Muğavimətə Hərəkati, "Ğələm" ədibon cəmiyyəti, Az.R Ruşinəfikron İbemoni, Az.R İslamə Partiya bahəm dəvuniə iclasədə bə Respublika hokuməti siyasiə məhbuson azad karde təklif bə nav doşone. Təbriz şəhəri imom-cumə hoccət-ul-islam Seyid MəhəmmədƏli Alihaşimi çe İlham Əliyeviku piəşe ki, mubarək Rəməzonə manqədə dini məhbuson çe zindono azad bıko.
Huğuğə mudafiəkar Oqtay Quləliyevi votəşe ki, Prezidenti ım əfv sərəncomi məmləkətədə bə siyasi məhbuson problemi həll karde dair etimadon təsdiğ nıkardışe.
634 nəfər məhkumonədə 607 nəfər bilavasitə zindonxonə məhbusonin, 9 nəfəri şərti cəzo, 6 nəfəri islahə ko, 11 nəfəri cərimə əfv kardə bıə. Təəssufinə cəhət əve ki, həmonə 607 nəfərədə 321 nəfər de qonə cinayəton əlağədar məhkum bıə odəmonin. 10 nəfər dini məhbus daxil cəmi 12 nəfər siyasi məhbusin. Əfv bıə dini məhbusonədə 6 nəfəri bo azad bıe ro cəmi çand manq muddətşon mandəbe.
Huğuğə mudafiəkaron ğeyd kardedən ki, Əliyevon hakimiyyəti devrədə ğəbul bıə əfv sərəncamon hic vaxt məmləkətədə siyasi məhbuson problem həll kardəş ni, ım sərəncomən çəvonədə qıley bıe.
