Bo Ğərəboği mınoğişə həl karde İroni cəhdon.

Ğəfğazi məsələon koşınas votışe, İron İslam Respublika dəvardə soronədə Azərbaycan Respublika və Ermənistoni miyono Ğərəboği mınoğişə həl karde xoto vey cəhdış kardə.

Bə Ğəfğaz məddəniyət mərkəzi pencşəmbə ruji raporti əsos, Ğəfğazi məsələon korşınas Əli Cəhani Təbrizədə bıə Ğərəboği mınoğişə beynəl xalği və məntəğəiyə rol ifoəkəyon iyən ım mınoğişə həl kardeyədə İroni zərfiyəton nomo iclosədə əlovəş do: İron, Pakiston və Tırkiyə 3 qılə kişvəron miyono həmkari bənə məntəğə ğudrəton ım mınoğişə həl kardey xoto veyn təsirin bəbe.

Ğəfğazi məsələon koşınas ım iclosədə ki de tarix və beynəlxalğ rabitəon ekspert və ustudon huzuri bərpo bıə təsdiğış kardə, dınyo təşkilaton bənə Avropa həmkari və əmniyyət təşkilati Minsk qurup Ğərəboği mınoğişə barədə hiç mısbət və əsərinə hərəkəti əncom dodə nin ya xot bo əncom doe zuşon ni.

Cəhani votışe, Ğərəboği mıvzo iyən Azərbaycan Respublika və Ermənistoni mınoğişə həl kardey barədə İron dəvardə soronədə ıştə xəymandəti nışoş do anədə ki bə hər 2tərəfi sulh metodon təğdimış ka və hətto otəş basti bəpeştə koon mudiriyət karde məsuliyəti ıştən ğəbulış karde təklifış do.

Azərbaycan Respublika və Ermənistoni miyono Ğərəboği barədə mınoğişə 1988 nə-sorədə bino və 1992-nə sorədə bə hərbi daveon əvəz be.