Boku zindononədə 117 nəfər siyasiə məhbus heste
“Bə Azərbaycani siyasiə məhbuson azadi ittifaği” jıqo məhbuson tojə siyahi elan kardəşe. Im siyahiədə 117 nəfəri nom heste. Huğuğə mudafiəkaron əvonşon 8 qrupədə təsnif kardə.
Çə məhbusono 6 nəfər jurnalist və bloqer, 1 nəfər huğuğə mudafiəkar, 6 nəfər muxalif partiya bə təşkilaton uzv, 3 nəfər navkonə Milli Əmniyyətə Vəzarəti “ğıbonon” , 1 nəfər siyasiə qirov, 55 nəfər dini, 31 nəfər Qəncə hadisə, 14 nəfər isə umrinə məhbusonin. Eyən əlavə vote lazime ki, Qəncə hadisə məhbuson məhkəmə proses bə orəx rəsəkəson nomon bı siyahiədəy. Çə məhbuson ki, muhakimə proseson dəvom kardedə, çəvon nomon hələ ki, bı restədə ni. Bı səbəbən məhkəmə tərəfo bəvon hukm handə bəpeş, ehtimal veye ki, çəvon nomonən bə ım siyahi əlavə bıbo. Bə yod buəmon ki, ım sori martə manqədə de Prezidenti əfv sərəncomi 50 nəfər siyasiə məhbus ozod bıe bə peş huğuğə mudafiəkaron əmandə 80 nəfər siyasiə məhbusonən ozod bıe orzu kardedəbin. Əmo ısət vindedəmon ki, Əliyevi hokuməti ıştə siyasiə irtica əməlonku dast kəşəş ni. Əfv sərəncomi bə nav siyasiə məhbuson miğdar 130 nəfərbe. Isət Qəncə məhbuson muhakimə orəxə bəpeş, yəğin ki, çəvon miğdar 150 –sən dəbəvarde.
“İslamazeri” sayti xəbə doşoe ki, Qəncə hadisə məhbusonədə 6 nəfəro ibarət qrupi apelyasiya məhkəmə bə orəx rəsə. Navonə məhkəmə bo əvon 6 soriku tosə 8 sori zindonə cəzo bıriəşbe. Apelyasiya məhkəmə çəvon 5 nəfəri cəzo 2 sor 6 manqiku tosə 5 sor muəyyən kardəşe. Çe Nemət Heydərli cəzo muddət bə 1 sor eğandışe. Əv ım muddəti zindonədə bıe səbəbiku, məhkəmə orəxə bəpeş ozod kardışone. Muttəhimon çe ım hukmikuən norozi mandən, votəşone ki, çəvon hiç qıley qıno nişone. Vəkilonən votəşone ki, ım ittiham bıəkəson qıno subut kardə hiç qıley dəlil ni, bəvon bəraət doe lozime.
