De Ğərəboği minoğişə bəhonə məntəğədə terrorçion iştirok, İron iyən Rusiyə niqəronəti.
İron və Rusiyə prezidenton Ğərəboği daveonədə co kişvəron mıdoxiləon həmçenin de Erməni-Azəri mınoğişə bəhonə cənubi Ğəfğaz məntəğədə terroriston işteraki barədə ıştə niqəronəti bəyon kardışone.
İroni prezident Həsən Ruhani de Rusiyə prezident Veladimir Putin telefoni sohbıti vositə Ğərəboğədə canqi bo iron vey tel iyən norohətəkə bə hisobış varde və votışe: ım behronədə co kişvəron mıdoxilə hukmən daveon dıroz karde amile.
Ruhani Ğərəboği daveonədə bəzi terroristiyə qurupon işteraki barədə Tehroni niqəronətion elanış karde və İron, Rusiyə iyən məntəğə əmniyəti vədə bıə ım təhdidi barədə muhimə notaonış do.
İroni prezident bo otəş bast iyən canqi tərəfon miyono muzakirəon bino bey çərçivədə Rusiyə səy-cəhdonış bə təğdiri loiğ bə hisobış varde iyən İroni harcurnə sulhinə koməkon əncom doeyro hozzı mandeyku xəbəş do.
Rusiyə prezident Veladimir Putin həm ım 1 saətə votımonədə bo Ğrəboği behroni həl karde çı Rusiyə siyasət-koon bəyon və əlovəş karde: Regional məsələon barədə İroni nəzə bo Rusiyə vey muhimmin.
Putin Ğərəboği daveonədə co kişvəron mıdoxilə həmçenin məntəğədə terroriston işteraki vey xətərnok zınəş be və votışe: həmmə hamsoyə kişvəron bəpe cəhd kon ki canq və xuni rukarde sə iyən behron de votımoni həl bıbu.
İroni prezident Həsən Ruhani de Rusiyə prezident Veladimir Putin ijən Amerkə i tərəfi və ğeyri ğanuni sanksiyaon tənqid və Vaşinqtoni unilateralizm siyasəton vədə bə Tehron-Maskva həmkarion inkişofi təkid kardışone.
