Bə Ğərəboğ məntəğə Ermənistoni xarıci vəziri səfər Boku dıvləti rəsmi şəxson əsəboniyəti bois bıə.

Azərbaycan Respublika xarıci vəzarətxonə sıxanəvot, Bə Ğərəboğ məntəğə Ermənistoni xarıci vəzir Ara Ayvaziyani səfəri məhkum və əy qıləy təhrik omizə ko bə hisobış varde.

Bə İrna raporti əsos, Leyla Əbdollayova voışe: ım təhrik omizə səfər tojə imzo bıə sazişon əks əncom bıdə iyən jığonə koon bə məntəğədə vəziyəti stabileti komək əkə ni.

Əv təkidış karde: Erməniston de tojə sulh muğavilədə bıə maddon fırsəti karde bəzne bə dustiyəti iyən sulhinə jimoni komək ko iyən aqah bıbu ki çəy əks təhrik omizə koon fəğət məntəğədə behronon bois bəbe.

Əmoo Ğərəboği bəzi məntəğəon ozodəti bəpeşt xəbə omə ki obdonəkə proyekton loyhə qədə qədə hozzı bey holədəy və prezident Əliyev Fuzuli məntəğədə airporti soxteyku xəbə dodə.

Həmçenin İlham Əliyev de tojə ğəroli bə Ğərəboği maliyə fondi təsis bey əmrış karde ta tojə ozod bıə ərazi obdon kardeyro sərmoyəon cəzb karde xoto investoron koon hoston bıbu.

Ğərəboğədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə be ki oxoy sə Rusiyə, Azərbaycan Respublika iyən Erməniston Noyabri 10 ım dıvrə canqi səkardeyro qıləy mıştərək sazışi imzo kardışone.

Həminə sazişədə sıvoy canqi sə karde, bə humanitar məsələon iyən əsiron və cənazəon vırə bə vırə kardey təkid bıə iyan ğeyd be ki Rusiyə sulhmərominə ğıvvon təmas və dave xəttədə sulhi təmin bəkan.

Ğeyd kardənine ki Ğərəboği muxtəlif baxşon əmniyəti təmin karde tosə 5 sor bə Rusiyə sulhbanon qi haştə bəy, peşo bəzi məntəğəon tale barədə ğərolon təin bəbe.