Azərbaycan Respublika bə Erməniston notaş do.

Azərbaycan Respublika xarıci vəzorətxonə bə Erməniston notaş do ki Ğərəboğ məntəğədə təhrikomizə hərbi hərəkətonku dast bıkəşi.

Bə İrib raporti əsos, Azərbaycan Respublika xarıci vəzorətxonə zinə de qıləy bəyoniyə vositə bə Ğərəboği tojə ozod bıə əraziədə bəzi Erməni hərbi qurupon fəaliyəti işarə iyən təsdiğış karde: 62 nəfər uzvış bıə Erməni hərbi quruponku qıləyni ki Ermənistoni tərəfo həmonə məntəğəonədə bə xərab karanə koon əncom doe məşğul bin tojədən dastqir bıən.

Im bəyoniyədə ğeyd be: Ermənistoni tərəfo jığonə təhrikomizə hərəkəton ki əmələn Ğərəboği mınoğişə iyən beynəl xlğ təvafuğ-ğanuni ləğv karde mənoədəy bə Azərbaycan Respublika hakımiyyət və ərazi təmamiyyəti zidd bıə oşko təcavuzkaranə siyosəton idoməy ki bəpe bə orəx bırəsi.

Im çand minnə kərəy ki Boku dıvlət Ğərəboğədə bıə Ermənion təhrikomizə hərbi hərəkəton barədə bə İrəvon tona dodə.

Ğərəboğədə Azərbaycon Respublika iyən Ermənistoni miyono tojə dıvrə daveon dəvardə sori Sentiyabrə manqi 27 ku bino bıə be ki oxoy sə Rusiyə, Azərbaycan Respublika iyən Erməniston 2020-ə sori Noyabri 10 ım dıvrə canqi səkardeyro qıləy mıştərək sazışi imzo kardışone.

Həminə sazişədə sıvoy canqi sə karde, bə humanitar məsələon iyən əsiron və cənazəon vırə bə vırə kardey təkid bıə iyan ğeyd be ki Rusiyə sulhmərominə ğıvvon təmas və dave xəttədə sulhi təmin bəkan.

Ğeyd kardənine ki Ğərəboği muxtəlif baxşon əmniyəti təmin karde tosə 5 sor bə Rusiyə sulhbanon qi haştə bəy, peşo bəzi məntəğəon tale barədə ğərolon təin bəbe.