Balaxonə ğəsəbə əhali sosial vəziyyət
Boku şəhəri Sabunçi rayoni Balaxonə ğəsəbə ərazi 4 tərəf natə buruğon əhatədəy. İm natə çolono şəvı ruj nat bekardedən. Əmo bə ım ğəsəbə problemon və bə çey əhali ımrujnə sosial vəziyyəti diə kardiədə bə yolə təzadon rast omə bedə.
Diy sakin Şəfiqə Səlimova iyo qıley qədə ərzağə duko hestışe. Ey bə "Azadlığ radiosu" müxbiri votəşe ki, 24 sore, bı dukonədə de ticarəti məşğulim, əhali quzəran sorbəsor qıvonin bedə. Nafko ruji 100 qılə nun həvatedəbim, ısət jı ruj bedə hiç 50 qılən həvate zındənım. Nunu ğıymət 50 kopiqe. Odəmonku anədə pul ni ki, ey nağd bısənon. Nısyə dəftərədə çanədə ailəon nomon hestin ki, har rujnə nuni nısyə sedən. Nısiyə pulon çı manq bə manq ıştə məvacib və pensiyon se bəpeşt oqordınidən.
Ğəsəbə cıvonon əksəriyyət bekorən. Həmid Noruzov 25 sınnədey, 3 qılə fərzənd hestışe. Bekorəy. Votedə ki, har ruj bə "Ğulon vıjor" şedə, də umu ki, qaspu qıley ko peydo bıko, boştə xeyzoni i rujnə nunə puli ğəzənc karde bızıno.
Ğəsəbə infrastrukturon, roon, kanalizasiya xətton bərbad vəziyyətədey. Çoko voş voyedə so-bəon, kuçon mandedən ovi jitono.
2011-2013 minə soron Boku şəhəri və çey ğəsəbon sosial inkişafi ro İ.Əliyevi 3 milyard mənot pul co kardəşbe. 2014-2016-minə soron inkişaf proqramədən im məntəğon infrastruktur problemon həll karde nəzərədə qətəşonbe. Əmo Balaxonə ğəsəbə im rujnə qıvoninə vəziyyət nişon dodə ki, devləti nəzərədə qətə planon və bo ım məğsədi co kardə milyardon çe ım məntəğəku yan dəvardə.
Müxbiri de Balaxonə bələdiyyə sədri vindemon karde cəhdi sə qətə nişe. Ey bə telefon zanqiən cəvob doəş ni.
