Operativə Ğərarqohi həvo nəğliyyati ğaydonədə kali əvəzon kardəşe

Azərbaycanə Respublika Vəziron Kabineti tono Operativə Ğərorqohi iyunə manqi 10-minə rujiku de Rusiya və Turkiyədə epidemiyaloji vəziyyəti sabit bıe əlağədar çəvon şəhrıvandon bə Azərbaycan de həvo nəğliyyati vasitə ome hoson kardə əvəzon barədə məlumat bə əhali nəzə rosniəşe

Çe ım devləton 18 sinniku bə pe sakinon de kovid pasporti və kovid testi neqativ nəticə barədə arayışi təğdim karde roy de həvopeyma reysi bə Azərbaycan səfər karde imkanədə bəben. 18 sinniku saru bıə odəmon isə iqlə kovid testi neqativ bıe arayışi təğdim kardənin bəben. “Sputnik Azərbaycan” sayti doə ım xəbədə votə bedə ki, nezə vaxtonədə ım əvəzon bə epidemiyaloji vəziyyəti stabil bıə co keşvəronən aid bəkarden.

Operativə Ğərorqoh iyunə manqi 10-ku bə plyajon, ticarətə mərkəzon, vərzeşə zalon , saleməti komplekson, məciton və ibadətə ocəğon fəaliyəti icazə doəşe. Əmo bə məçiton fəaliyyəti əlavə qıley məhdudiyyət noəşe, əvən çımədə ibarəte ki, məçitədə eyin vaxtədə bıəkəson miğdar bəpe 50 nəfərisən vey nıbo. Meydan TV xəbə doəşe ki, de ım məhdudiyyəti əlağədar vəkil Elmar Suleymanovi bə məhkəmə muraciət kardəşe. Ey ıştə iddia ərizədə ğeyd kardəşe ki, ticarətə mərkəzon, restoranon, vərzeşə kompleksonədə 100 nəfərisə, metro vağonon və avtobusonədə 50 nəfərisən vey odəm bedə. Çəvon həcm çe məçiton sahəsə xeyli qədəliey, əmo bəvon jıqo məhdudiyyət tətbiğ bedəni, bəs bə kom səbəb məcitonədə bəpe 50 nəfərisə vey odəmi iştiraki icazə nıbo. Suleymanovi ımən votəşe ki, Operativə Ğərorqohi məçiton səpe noə ım məhdidiyyət bə çand həzo odəmon, həmən bə çey  ıştə dini etiğadon azad surətədə icra karde ro suni mışğılon bə əməl vardedə, hiç qıley məntiği əsosış ni,  Respublika Konstitusiyadə təsbit bıə bə dini və etiğadə azadi prinsipon ziddin. Bı səbəbən Ğərarqoh bəpe ıştə ım məhdudiyyəti ləğv bıkardo.

İbrimi Zahirəddin, çe Rusiya Yekaterinburğ şəhəriku. İİR sədo, tolışi radio.