Hokuməti bardə islahaton boçi nəticə dodəni

Orəxnə soronədə Əliyevi hokuməti keşvəri iğtisadi, siyasi jimonədə mevcud behrani həll karde ro bə islahaton start doe həxədə xeyli anonson doəşbe

De ım məğsədi çanədə barzə vəzifədaron de cıvonə, Avropa təhsilinə kadron əvəz kardışe, çanədə vəzarəti məmuron, rayonon icra hakimiyyəti sərdaron de rışvəxorəti ittihami dastqir bin, bə çəvon əleyh cinayətə koon bino kardışone. Isət kafi ğədər vaxt dəvardə ki,  ım kadrə islahaton hiç qıley nəticə nıdoe oşko vində bıbo. Rayonon tojə cıvonə icra sərdaron, Avropa təhsilinə tojə vəzironən bənə  navonə kanə vəzifədaron ko kardedən, keşvəri Mass-mediadə çəvon ıştə vəzifə səlahiyyətonku sui-istifadə , rışvəxorəti, ğohombazəti barədə məlumaton miğdar hiçən bə kam bedəni. Imən ey subut kardedə ki, problem məvotbən kadronədə ne, məhz usuli – idarədəybən.

“Teref.az” sayti bə ım problemi dair nıvıştə təhlili məğalədə ğeyd bedə ki, çand sorone eksperton icra hakimiyyəti təsisati ləğvi, rayononədə bələdiyyə idarə sistemi tətbiği,  inzibati islahaton barde, rayonon miğdari bə kam karde, 15-16 qılə iğtisadi vilayəton onoe, bəvon çe prezidenti numayəndon təyin karde təklif kardedən. Deputat Fəzail Əğəmali bə ım təklifon tərəfdar beşə, votəşe ki, haliyədə devləti idarə sistem bə muasir tələbon cəvob dodəni, Prezidenti bə işğalo azad bıə rayonon ıştə səlahiyyətinə numayəndəon təyin karde nişon dodə ki, islahaton məhz ım istiğamətədə dəvom bəkarde.

Parlamenti co qıley deputat Ağil Abbas isə bə icra hakimiyyəti təsisati ləğvi əleyh beşə, çimi səbəb jıqo izah kardəşe ki, “ rayononədə icra sərdaron bə har çiy cəvobdehin, hərçənd ki rayoni təşkilaton bey tabe nin, əmo çəvon kardə kohındə hərəkəton cəvobi çe icra sərdariku parsedən.”

Imi əlavə bıvotəmon ki, hurmətinə deputat Ağil Abbas bedune şəkk  “İcra hakimiyyəti həxədə əsosnomə” məzmuni çok zınedə. Həmonə əsosnomədə rayoni həmə devlətə təşkilaton bə İcra sərdari tabeyin. Hiçən təsaduf ni ki, içtimaiyyət həmonə sərdaron çe rayoni qədə podoşoh hisob kardedə və keşvərədə şə islahaton besəmər mande əsasə səbəbiən icra hakimiyyəti təsisati mevcud beədə vindedə.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.