Məhəmməd Əli Axundzadə bə ozodi beşe.

Siyasiə məhbus Məhəmməd Əli Axundzadə bə ozodi beşə. Bı barədə “Maide.az” sayti xəbə doəşe

Çey zindonə cəzo muddət tam bə orəx rəse səbəbiku əv çe 6 numrəninə zindonxonəku vadoəşone. Axundzadə Ostoro polison tərəfo 2015-minə sori dastqir kardəşonbe, de bıhtonə ittihamon boeyo 6 sorimə zindonə cəzo bıriəşonbe. Həmən bıvotəmon ki, Məhəmməd Əli Axundzadə dini məhbus, İslamə Partiya uzv Ruhullah Axundzadə zoəy. Ruhullahşonən 2011-minə sori bə 11 sornə zindonə cəzo məhkum kardəşonbe. 3 manq bənav əvən çe zindono bə ozodi beşe.

Əmo Boku hokuməti zindononədə siyasiə və dini məhbuson miğdar hiçən bə kam bedəni. Həmonə məhbusono qıleyən “Xeberman.com” sayti redaktor, jurnalist Polad Aslanove ki, Əliyev rejimi əv bə 16 sori muddətinə məhbəs dənoəşe. Çey jimoni həmro Qulmirə Aslanova bə Meydan TV xəbə doəşe ki, zindoni rəhbəriyyət Aslani məcbur kardedə ki, əvf barədə ərizə bınıvışto. Polad rozi bedəni, bə səbəbən məhbəsədə  bə muxtəlifə təzyiğon məruz mandedə. Ey de bə Ğobustoni sərpuşə zindonxonə vığande təhdid kardedən.

“Contakt.az” saytən nıvıştedə ki, Boku zindononədə doktoron çe məhbuson mualicəku imtina kardedən. Huğuğə mudafiəkaron jıqo fakton 14 numrəninə zindonxonədə bə siyasiə məhbus , jurnalist Elçin Məmməd`i, 1 numrəninə zindonxonədə siyasiə məhbus, jurnalist Polad Aslanovi və Elnur İsmayılovi munasibətədə bə ğeyd səşone.

Qəncə hadisə məhbuson ailə uzvonən ıştə aktivə siyasiə fəaliyyəti dəvom kardedən. İyuni 21-də əvon Prezidenti Adminstrasiya bina vədə  “Bə Qəncə məhbuson azadi” şuar bəyon kardəşone. Polison bə aksiya mudaxiləşon kardə, etirazkaron həmonə əraziku tojniəşone.

De Qəncə hadisəon əlağədar 2018-minə sori  70 nəfər 6 soriku tosə 18 sori bə zindonə cəzo məhkum bıə. Çəvon ailə uzvon ımi bıhton zınedən, və çe devləti rəhbəriyyətiku əvoni ozod karde tələbi bə nav dodən.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.