Ğəzax rayoni mərizxonədə çe noxəşini ğızılə dandon dızdiəşone

Tovuz rayoni Alakol di əji 62 sininə Leyla Əzizova de sipiə ciğəri satılcam , yəni pnevmoniya diaqnozi bə Ğəzax rayoni mərkəzi mərizxonə dəğandəşonbe

Çey jimoni həmro Arif Əzizov ıştə bə Meydan TV kardə şikatədə votedə ki, çe Leyla diaqnozədə kovidə infeksiya benışe holədə əvşon de kovidə noxəşinon i vırədə bə reanimasiya palata dəğandıe.  Qirəm əv bə kovid mubtəlo bəbe, jəqo çəmə xezoni həmə, azən əzcumlə, bəpe bə karantin cəlb bəbin. Əzizovi votəyonku məlum bedə ki, i həftə bədiqə Leyla Əzizova mərizxonədə vəfot kardedə. Çey penə nəği protez ki,  8 qılə ğızılə dandono ibarət bıe, dızdiəşone. Mərhumi kinə Dunya Əzizovan votedə ki, “əmə çe mərizxonə rəhbəriyyətiku kamera vindemoni təğdimi tələb kardedəmon, əmo əvon çimiku imtina kardedən. Kaş ki, bəpe ıştə moə kədə mualicə kardəmonbe. Mərizxonədə əvşon bə kovid mubtəlo karde, de ım dardi kıştışone, çəyoən çey ğızılə dandonon dızdişone. Isətən çəmə kardə şikaton muğabilədə bəmə qıley jinə nəği 4 dandono ibarət protez dodən ki, əmə həni şikat nıkəmon”.

Həmonə mərizxonə sər doktor Sevda Məmmədova de muxbiri qəpədə iddio kardəşe ki, ailə bə çəvon adres votə ittihamon beəsose. Noxəşin Leyla Əzizova qonə vəziyyətədə bə mərizxonə vardəşonbe, iyo tibbi personali 10 ruj əv mualicə kardışe, əmo çey jimon xilas karde mumkun nıbıe,  vəfot kardə bəpeş çey meyt bə morq vığandəşone. Morqədə əv dezinfeksiya bıe, bə kəfən qətəşone, və bənə kovidə mardəy bevasitə, yəni isəynə bə ğəbıston dəro kardəşone. Jəqo holədə, ki çey kəfən oj kardəşe, bə çey qəvədə protezi bıe-nıbe diə kardəşe? Xəlvəti korona virusə meyti oj karde ğədəğəne, bə ım əməli mubaşir bıəkəson bə cinayətə məsuliyyət bəpe cəlb bıbon.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.