Ostoroədə mejəvonə təsərrufaton
Ostoro mejəvonon ımsornə mevsumədə çokə məhsul istehsal karde imkanədən. Rayoni Tuləqiəvon diy əji Tural Hidayətovi bo “Sputnik Azərbaycan” sayti muxbiri qəp jəşe ki, dəvardə sori de karantinə ğədəğon əlağədar xeyli mışğılon bə əməl oməbe
Imən bey vardışe bekardışe ki, har sornəsən kam - 300-400 kilo anqivin vate zınemone. Çey həvateədən problemon hestbe. Çunki bə karantinə rejimi qorə rayoniku bə Boku şe mumkun nıbe. Əmənən ıştə məhsulon bə vıjor bekarde nızınəmone. Həmonə mevsumədə cəmi 200 kilo anqivin həvatıme. Az ponə sori 1 ton 500 kilo anqivinım tədaruk kardəbe. Haliyədə çey 400 kilo mandə, həvatem zınəni. Hidayətovi ım sori məhsuldarəti həxədə ğeyd kardəşe ki, ıştə mejəvonə təsərrufatədə 183 qılə pətəq hestışe, umidəvoe ki, ımsor 2 ton anqivin vate bəzıne. Mıştərionşən əsasən Boku şəhəri sakinonin. Tosə ısət 200 kilo anqivin sifariş doəşone. Qirəm ım sor bənə ponə sori saxtə karantinə rejim tətbiğ nıbo, pozədə Bokuədə Anqivinə yarmarka təşkil bənine. Əyo ıştə məhsulon tam həvate imkanımon bəbe. Bə dəvardə soron nisbətədə ğıyməton boho bıə. Imsor anqivini ibıno ğıymət bə 18-20 mənot, pərakəndə həvatə ğıymət isə 25-30 mənote.
Mejəvon Tural həmən bioloqiya mutəxəssise. 5 sore ki, ıştə mejəxonədə həmən de seleksiya məşğule. Çe xarico vardə kandı muzə sortonən perosnidə. Votedə ki, çe Avstraliya və Almaniyaku vardə kandı nevon hestin. Əvon bə bumiə nevon nisbətədə 2 kərə vey məhsul dodən. Bumiə mejon 1 pətəqədə 10 kilo anqivin vate bedəbu, çe həmonə mejon har pətəqədə 20-25 kilo məhsul peqəte mumkune.
Mejəvonəti bo Tural Hidayətovi çey dədə-bobonku mandə. Iştən 12 sore ki, ım ko boştə bənə ko-peşə vıjniəşe. Ğeyrəz anqivini co kandıə məhsulonən istehsal kardedə. De muxbiri qəpi orəxədə votəşe ki, bo həvate ro de kandıə ailə, mejə sıt, vılə cevhər, quləm, propolis istehsaliən məşğul bedə.
İbrimi Zahirəddin. Çe Rusyia Yekaterinburğ şəhəriku, İİR sədo, tolışi radio.
