Arçıni diy problemon.
Arçon çe Ostoro ən qıjdə die. Tosə 10 həzo nəfər sakin hestışe. Tarıxış 5 əsrisən veye. Səfəvion hərəkati ən zumandə mərkəzono qıley ım diədə bıə
Azadi Radio muxbir çe diy cıvonon problemi omute ro bə diy əji Mətləb Eynillayevi kə mehmon omə. Mətləb çe ailə i qılə evlade. Dıminə Ğərəboği muharibədə iştirak kardəşe. Isət bə sulhi tərəfdare. Votedə ki, diy cıvononən bı fikirədən. Əmo vey yavəy ki, diədə sənaye, və ya di təsərrufati məhsulon emal kardə muəssisə ni ki, cıvonon əyo ko bıkon, ıştə əmrəməli dəvunion, boştə ayəndə jimoni təşkil karde ro qıley perspektiv bə dast varde imkanədə bıbon. Rayoni rəhbəriyyəti bə Mətləbi sıxan doəşe ki, çey 20 sinni təmomi bə peş ey bənə muharibə veterani de koy təmin bəkarden. Bekorəti cıvonon tamamən çe valideynonku də jidasti vəziyyət eğandəşe. Kəxıvand bıe, izdivac karde ro nə maddi imkan, nəən kə-bə nişone. Bı koədə əvon vey naumudə vəziyyətədən. Bə səbəbən boştə i tikə nun ğəzənc karde ro çe diku bə Boku , bə Rusiya muhacirət kardedən. Arçoni cıvononku bəştə dini mənsubiyyəti, bə Əhlibeyt (ə) məktəbi obast, həmən məhəbbət vey zumande. Cəvon vey ğism de ibadəti məşğul bedə, nomoj votedə, rujə qətedə.
Mətləbi pıə Vuğar Eynillayevən de çey fikron rozie. Votedə ki, diədə cıvonon ıştə jimoni təşkil karde imkaniku məhrumin. Divojəti çəvon orzuon bə puç bekardedə. Bə qorə əvon çe diyku sə peğətedən beşedən şedən.
Arçoni icra hakimiyyəti numayəndə Cəbrayıl Salmanov isə de ım fikron rozi ni. Ey izah kardəşe ki, diədə bo çıvonon ıştə vaxti de səmərə dəvunie ro har imkan və şərait heste. Mədəniyyətə kədə və 1 numrəninə məktəbədə rə-rə muxtəlifə vərzeşə musabiğaton dəvunidən. Bo əhali de keşavərzi, heyvandarəti, boğəvonəti məşğul bıe ro şərait heste. Imən hejo koə vıronin. Cıvonon izdivacən kardedən, kəxıvandən bedən. Əhali miğdarən şe-şe vey bedə.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
