Boku hokuməti "Fatimeyi Zəhra" məçit oçınie pidəşe
Boku şəhəri Tojə Qunəşli ğəsəbə "Fatimeyi Zəhra" məçit ijən çe hokuməti tərəfo de oçınie təhdidi vəbəvə mandə. "Azərbaycan 24" sayt bə " Modern.az" sayti istinadən nıvıştedə ki, qıley naməlumə məmur həmonə 1 hektar 30 cot zəmin hıriəşe, əyo jı çi inşa karde fikirədey.
Im, məçiti tarıxədə iminə oçıniə təhlukə ni. Vəkil Cavad Cavadovi votəşe ki, 1996-minə sori Boku şəhər İcra Hakimiyyəti bə Tojə Qunəşli dini icma məçit inşa karde ro 1,3 h zəmin co kardəşe. Tosə 2002-minə sori dindaron əyo "Fatimeyi Zəhra" məsçit inşa kardışone. Əmo ım ko bə orəx rosnie nıznışone. 2002-minə sori oktyabri 31-ədə Boku İcra sərdar Hacibalə Əbutalıbovi qıley tojə sərəncom nıvıştışe, -96-minə sori ğəror ləşv kardışe. İm bə dini icma üzvon sərt etirazi səbəb be. Nəhayət, 2010 -minə sori Prezidenti müdaxilə nəticədə məçit və çey ətrofi zəmin bə Ğəfğaz Mısılmonon İdarə balans ovoştonişone. Bı dəvardə 6 sori müddətədə məçiti inşa bə orəx rosnie ro Mısılmonon İdarə hiç ko nıkardışe. Əmo məçitədə əhali daima ibadət və dini mərasimon icra kardedə, ım məçit hiç vaxt tey mandedəni.
Vəkil Cavadovi İslamə Həmrayəti sorədə qıley məmuri əhali ibadətə vırə ğeyri-ğanuni çəvon dasto se, məçiti oçınie bə devləti siyasəti əleyh qıley təxribat hisob kardəşe. De Dini Təşkilaton əlağədar Devlətə Komitə sədri müavin Qunduz İsmayıloviən votəşe ki, Komitə de "Fatimeyi Zəhra" məçiti əlağədar mübahisə tədğiğ kardə bəpeşt bı barədə ətrofinə məlumat bədo.
