Har sor dəm ğazi problem təkrar bedə.

Bənə har sori , ım sornə zımıstonədən Az.R -ədə çe dəm ğaziku mardə və ya zəhrəlud bıə sakinon xeyli miğdarədə bıe

“Sputnik Azərbaycan” sayti iqlə fevralə manqədə Xırdalan şəhərədə 10 nəfəro ibarət xeyzoni, Qeranboy rayoni Ğərədağli diədə 9 nəfəri çe dəm ğaziku zəhrəlud bıe, Qeyçay şəhərədə 1 kəs, Ğusar rayonədə isə 5 nəfəri həmonə səbəbiku marde xəbə doşe. Yanvarə manqədə Minqəçevir şəhərədə 3 nəfəro ibarət ailən bə jıqo hadisə məruz mandəbe.

“Virtual.az” saytən fevralə manqədə Qəncədə 3 kəsi, Bərdədə 2 kəsi, Xaçmazədə 2 kəsi dəm ğaziku tase xəbə pevolo kardəşbe. Sayti ım ictimai bəlo səbəbon analiz kardə qıley məğalədə nıvıştəşe ki, ım hadisəon əksəriyyət həmomədə ov tat kardə cihazi səhv ko kardeku bə əməl omedə. Həmonə cihazon həvatə mağaza mudiron bə sayti muxbiri məlumat doəşone ki, qıno ım ovdononədə ne, kə xıvandonkue ki, həmonə cihazon ıştən peğandedən, vey vaxt çəvon zıvoni nızıneku əvoni səhv tazisə nodən. Əslədə ım ovdoni mutəxəssison xidmətiku istifadə karde lozime ki, jıqo bədbəxtə hadisəon vağeə nıbo. Qıley əhavatiən qəp jəşe ki, əvon Rusiya, Turkiyə, Polşa, İtaliya, Almaniya, Çinədə istehsal bıə ov tat kardə ovdonon həvatedən. Çəvonədə həmməysən erjoni Çin və Rusiya molone, əmo Rusiya mol tikiən etibarine. Rəşad nominə əhavati votəşe ki, kosibə odəmon bə 150-200 mənot keyfiyyətinə cihozi hırie ro imkanşon nıbe səbəbiku bə 50-60 mənot nimdoştə qılə sedən, çəvonən keyfiyyət və texniki vəziyyət saru bedə, jıqo holədə bədbəxtə hadison ehtimalən vey bedə.

Jıqo hadisəon şe-şe vey bıe qıley səbəbən ıme ki, huğuğə muhafizə orğanon çəvon səbəbi təhğiğ kardedənin. Bə jəqo facion har qılə dair cinayətə ko bino kardedən, təhğiğat bardedən, əmo tosə ısət jıqo hadisəon hiç qıley əsl səbəbi həxədə bə ictimaiyyəti məlumat doəşon ni ki, əhali çeyku xəbə bığəto, nəticə bekardo ki, i kərən hiç kəs bə jəqo xəto dıço nıbo, jəqo əcəl har qıley xeyzoni kəybəku diəro bıbo.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.