Pensə vıjorədə vəziyyət

Nəvuzə idi ərəfədə vıjoronədə ğıyməton har sor boho bıe çe vıjorə iğtisadiyyati əsasə əlomətonədəy. Çunki jıqo holədə ğıyməton de tələb və təklifi arədə nisbəti muəyyən bedə

Əmo Nəvuzə idi bə peş Az.R vıjoronədə ğıyməton rujbəruj ros bıey, de ım ğanuni hiç qıley əlağə nişe. Azadlıq.info sayti muxbir Ostoro rayoni Pensə vıjorədə qıley muşahidə dəvuniəşe, de əhavaton, həmən de əhırion qəp jəşe. Çəvonədə qıley votəşe ki, bumiə kaqə moğnə ğıymət çe 20 kopikiku bə 30 kopik ros bıə. Çimi səbəbi de çinə boho bıe obastedən. Əhali quzəran şe-şe qon bedə. Nafqo Rusiyadə bıə odəmonku bəştə ailə maddi komək əvoy, ısət əvən ğıt bedə.

Vıjori dəşəsədə qubrə əhavat qəp jedə ki, vıjori erj xeyli saru eqıniə. Çimiən səbəb əve ki, ğıyməton vote bəbe ki, har ruj boho bedə. Haliyədə qubrə çe nunisən bohoe. Dəvardə həftə azotə qubrə 1 kilo bə 60 kopik bıe, ısət bə 70 kopike. Əhali xıridarəti kam bıe, vıjorədə savdışən xeyli zəif eğandə. Nafko mıştərion qubrə de kisə əhırin, ımsor de kilo  hıridən, votedən ki, maddi imkanşon ni.

Əli nomədə sef əhvatən de muxbiri həmsehbət bıə, ğeyd kardəşe ki, Lankonıje, çe Ğubaku sef vardedə. Sefi ğıymət bıho bə ni. Çunki ımsor de Rusiya marzon dəbastəşonbe. Bə Rusiya məhsul barde mumkun nıbe. Isət vıjorədə sefi 3 kilo bə 1 mənote.

Kərtof əhvaton votəşone ki, haliyədə vıjorədə bumiə kərtof ni, çe İron, Pakiston, Turkiyə məhsulonin. Ponə sori ğıymət bə 60-70 kopik bıe, ımsor 1 mənot 15 kopikiku tosə 1 mənot 50 kopikie.

Kələməhvati votəşe ki, Şiəkonıje, ıştə perosniə məhsuli həvatedə. Əvşən votə ki, kələmi ğıymət boho bıə ni. Bənə nafkonə vaxton kiloş bə 1 mənote. Noxoti ğıymət 4 mənot, piyozi ğıymətən bə 1 mənote. Həmə ıştən perosniəşone. Ey ıştə problemon həxədən qəp jəşe ki, məhsul perosnie sorbəsor cətin bedə. Sutemoni ğıyməti boho bıe çe zəhmətkəşon peşti sındınidə. Imsori ovayziən bə çəvon kaşteko yolə ziyon jeşe. Əmo co çarə nişone. De kaşteko ıştə quzəroni tətiməy bə səhmon dəğandedən. Co imkanışon ni.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.