Əmirəbdullahiyan: bəpe bə Ğəfğaz kişvəron ərazi təmamiyyət ehtırom noey bənə əos bıbu

İroni xarıci vəzir votışe: bəpe bə Ğəfğaz kişvəron ərazi təmamiyyəti ehtırom noey bənə əos bıbu və məntəğədə xarıci hərbiçion iştirokiku İron ıştə niqəronion ğoym surətədə elanış kardə

Bə İrna raporti əsos, Zinə və bə Erməniston səfər kardey cərəyonədə, İroni xarıci vəzir Huseyn Əmirəbdullahiyan de Ermənistoni xarıci vəzir Ararat Mirzoyani vindemon iyən beynəlxalğ və 2tərəfi vey muhimmə məsələon barədə de yande votımonışon kardə.

İroni xarıci vəzir işorəş karde: marzon iyən məntəğə jeopoloteqiya əvəz bey barədə ğoym surəti İron ıştə muxalifəti elanış kardə, əv ijən votışe: Erməniston və Azərbaycan Respublika miyono hərbi daveon məntəğədə niqəronion icodış kardə və Ğəfğaz məntəğədə vey saxtə şəroyeti dəvardedə, əmə etığadımon heste ki Ğəfğaz məntəğədə kişvəron ərzi təmamiyyət bəpe bənə əsos nəzərdəğətə bıbu.

Əmirəbdullahiyan ijən dəvomış do: vey xuşhalimon ki İron və Ermənistoni rabitəon vey çokə royədə ğərorış qətə, və əmə Ermənistoni əmniyyəti, çı məntəğə əmniyyət zıneydəmon və məntəğədə xarıci hərbiçion iştirokiku çəmə niqəronion oşko surətədə elan bıə.

Ermənistoni xarıci vəzir Ararat Mirzoyan həm İroni xarıci vəziri səfəriku xuşhal be iyən votışe: 2 qılə kişvəron rəsmi şəxson miyono veyə vindemonon iyən votımonon əncom bıə ki İron İslam Respublika və Ermənistoni dustanə və kanə rabitəon nışonəy.

Ermənistoni xarıci vəzir ijən təkidış karde: Erməniston hozzoe ki 2 qılə kişvəri miyono rabitəon təmin iyən hevuj ko iyə votışe: Miladi 2020 minnə soriku Erməniston bə Azərbaycan Respublika həmləoni əncom doşe ki çəvon oxonə kərə Sentiyabrə manqi 13 minnə ruj əncom bıə. Ermənistoni marzon oqətey barədə İroni oşko iyən ciddiyə mesajon ğədrdonimon iyən pidəmone bə muzakirəon idomə bıdəmon.

Zinə İron İslam Respublika xarıci vəzir Huseyn Əmiəbdullahiyan dıştə heyəti bə ico bə Erməniston varid bıə və Ermənistoni xarıci vəziri muavin Monatsakan Səfəriyan bə çəy pişvoz şe.

Im səfərədə, Huseyn Əmirəbdullahiyan de Ermənistoni rəsmi şəxson vindemon iyən votımon kardışe ki ım vindemononədə vey muhimmə mıvzoon, 2 qılə kişvəri iğtisodi və siyasi rabitəonin.

Əmiəbdullahiyan həmçınin ğərore ki ım səfərədə Ğapanədə İroni sərkunsoli rəsmiyə ojbemoni mərosimədə iştirokış bıbu.