Pakistoni məzhəbi iyən siyosi məşhurə şəxsiyəton bə Fələstini mıstəğilə kişvəri icod bey təkid kardışone.
Qıləy iclosədə, Pakistoni məzhəbi iyən siyosi məşhurə şəxsiyəton bə Fələstini mıstəğilə kişvəri icod bey ki bə Beytulmuğəddəsi paytəxt bıbu təkid kardışone.
Cımə rujədə və de Pakistoni milli hambasteqi şura cəhdon vositə, Pişavər şəhrədə, Fələstini ozodi hərəkətədə islomi umməti rol təğib kardey iclos bərpo bıə və nıtğəkəyon bə israili işğolçiyəti ələyh Fələstini muğavimətiku ıştə himoyəon elon kardışone.
Bə İrna raporti əsos, ım iclosədə, Pakistoni məzhəbi və siyosi məşhurə şəxsiyəton Ğəzzədə sionist rejimi cinoyətonku Amerkə və ğərbi cəhbə himoyəon devləti terrorizmə oşkoə nımunə zınəşe və təkid kardışone: Ğudsi ozodi iyən Fələstini mıstəğilə kişvəri icod kardey yeqanə hələkəroye və hiç vaxt, islom dınyo 2 qılə kişvəri hələkəroy təslim nıbəbe.
Im iclosədə, nıtğəkəyon, Ələğsa Tufani əməliyot, israili rejimi obod nıbıə zərbə zınəşone və əlovəşon kardə: Fələstini canqəkəyon hərəkət, bə çand dahə ğətli cəvobədə be ki sionist rejim bə Fələstini milləti ələyh əncom doəş be, əmmo işğolçiyon bə Ğəzzə be mudafiə milləti ğətliam dast jəşone və ım cinoyətədə Amerkə və çəy mıttəfiğon sərost surəti taxsikor hestin.
