Ərbeyni zəvvaron əmniyyəti 35 həzo nəfər polis təmin bəkarde

Bənə har sornə ımsorən çe İmom Huseyn (ə) şəhadəti çılımə ruji, yəni Ərbəinə mərasimədə iştirak karde ro bə Kərbəlo ziyarət şə zəvvaron de 10 milyonon miğdarədey. Çəvon əksəriyyət ım ziyarəti "eşği səfər", "eşği kərvon" zınedə və Nəcəfiku bə Kərbəlo arə məsafə piyodə ğət kardedə.

Imsorən çe Az.R-ku bə Ərbəini ziyarət şə zəvvaron xeyli miğdar hestışone. "Nur-az.com" sayt xəbə dodə ki, ım zəvvaron şe-omə de hoson karde məğsədi İron İslamə Respublika hokuməti bə çəvon Mehran sərhəd məntəğəku ovaşte icazə doəşe. Bı barədə Ərbəin Mərkəziə Ğərərgohi sıxanəvot Şəhriyar Heydəri məlumat doəşe. Ey votəşe ki, tosə ısət Az.R və Turkiyə zəvvaron çe Şələmçə məntəğəku bə İrağ varid be əznin. Isət əvon həmən Mehran və Xoşrəvi sərhədə məntəğə xidmətikuən istifadə karde imkanədə bəben.

İm sayt bə "Parstoday" sayti əsasən bəştə əhandon nəzə rosnidə ki, Kərbəlo şəhər polisi rəis qeneral-mayor Əhməd Zəvini  votəşe ki,  İmom Huseyn (ə) Ərbəin mərasimi ziyarətəkon əmniyyəti 35 həzo nəfər polis muhafizə bəkarde. Daxili Koon Vəzarəti diqər əlavə ğıvvonən bə Kərbəlo vığande nəzərədə qətəşe. Zəvini həmən ğeyd kardəşe ki, Kərbəlo ətrofi bənə Ənbari məntəğon əmniyyəti təminatədə çe Əl-Həşduş Şəbi ğıvvon koməkətiku istifadə bəkarden.

Imsor ehtimal heste ki, iqlə İroniku təxminən 3 milyon zəvvar Ərbəin mərasimədə iştirakşon bəbe.