İron və Pakıstani miyono parlemantiyə əloğəon ziyod bəbe, de terrorizm mubarizə barde roon barde həmkarion məxsusə iclos Pakistonədə bə oxo rəsə.

Imruj İroni məclesi sədr Əli Laricani İslam Abadədə Pakistoni milli məclesi sədr Sərdar Əyaz Sadeğ mulağat iyən bə 2 tərəfiyə həmkarion təkidış kardə.

Əyaz Sadeğ çı Pakistoni de terrurizm mubarizə barədə nomo bıə iclosədə İroni heyəti huzur və iştirokiku ğədrdontiş kardə iyən votışe: İroni məclesi rəisi huzur ım iclosi de muvəffəğiyət dəvoniye cərəyonədə vey rolış be boçi ki bo Pakistoniro İron qıləy muhimmə kişvəre.

Əli Laricani həm ım vindemonədə İron və Pakistoni miyono rabitə və əloğəonış vey dustanə zınəş be iyən Çabəhar-Qoader nomo bıə ğətariyə xəti komil karde bo 2 qılə kişvəri ticarət və iğtisodiyati vey foydəin hisobış kardə.

Laricani çı Pakistoni milli məclesi rəisiku dəvətış kardə ki omə sorədə Tehronədə bıə məclison rəison miyono beynəl xalğiyə iclosədə iştirok bıkə.

Əmmo Pakistonədə zinə ruji iclosi cərəyonədə İroni islamiyə şura məclesi sədr Əli Laricani ıştə nıtğədə çı Amerkə milli əmniyyət stratejikə sənədon bə ğələtə məlumaton əsos hisobış kardə ijən votışe: qılə holədə ki Amerkə pidəş be Suriyə və İrağədə DAEŞ-i məsələn ıştən məğlub bıko əmmo İron, Russiyə və Tırkiyə həmkarion sayədə DAEŞ əmələn bə məğlubiyət rəsə və Amerkə ım sahədə hiç rolış nıbe.

Əli Laricani təsdiğış kardə Amerkə ısət məntəğədə tojə senariyoon pesoxte dumoədəy və de macəraon vasitə məsələn iddia kardə ki İron bə Yəməni hosion siloh dodə.

Ğeyd kəmon ki İroni məclesi rəis zinə və ımruj de Russiyə dumay məclesi sədr və Pakistoni senat parlemanti rəis həm vindemonış kardə.

De terrurizm mubarizə barde ijən məclison həmkari çərçivədə məntəğədə mıştərəkə əloğə və strateqiyaon nomo bıə iclos zinə Pakistonədə de İron, Russiyə, Tırkiyə, Əfğanestan və Çini parlemanton, senat və Dumay məclison rəison huzuri bino və ımruj bə oxo rəsə.