De Həzrəte İsa Məsih(ə)-i milad ruji mınosibəti təbrik.

Imruj Dekabri 25 ijən Həzrəte İsa Məsih(ə) moəku bıə ruje.

Kərim Ğıronədə Həzrəte Məryəm(s)-i qiramiyə zuə, Həzrəte İsa Məsih(ə) de Ruhullah nomi ğeyd bıə.

Həzrəte İsa(ə), yəhudiyon osmoniyə kitob Turatədə təsdiğış kardə ki mıku bəpeşt de Əhməd(yəni islam dini qiramiyə peyğombər(s)) nomi qıləy Rəsul bome,.

Məsihion, İsa(ə) milad ruji məxsusə mərasimonədə vey bərnoməon bərpo kardedən ki kədə noyə sori yolkə səpo karde çəy məşhur mərasimon və adətonin.

Bə həminə mınosibəti xoto, zinə şəviku İroni ermənion və məsihion məxsusə şoə bərnoməon bərpo kardəşone.

Məsihion miyono Həzrəte İsa(ə) moəku bıə ruji barədə ixtilafon heste, əmmo əvon qırd Yanvari i minə ruji bənə noyə sori i minnə ruji ğeyd kardən.

Bə həminə mınosibəti əloğədor, Tvitterədə İroni Yolə Rəhbəri səhifə qıləy mesajədə ğeydış karde: İsa Məsih(ə)-iku itaət karde, ədalətiku təəbəiyət iyən ğeyre ədalətinə hukumətonku nifrət bəyon kardeye.

İroni prezident, Həsən Ruhani həm Həzrəte İsa Məsih(ə) milad ruji ğeydiyati bə dınyo muxtəlifə kişvəron rəsmi şəxson iyən ə həzrəti tərəfdaron təbrik votış.

İroni məclesi rəis Əli Laricani həm qıləy mesajədə Həzrəte İsa(ə) milad ruji ğeydiyati bə məsihiyə kişvəron parlament rəison təbrik votış ijən ilahi dinon tərəfdaron miyono sulhi tələbış kardə.

İroni prezidenti i minə muavin Eshağ Cəhanqiri və İroni həmmə silahinə ğıvvon ğərorqoh qeneral mayor Bağıri həm dıştə məxsusə mesajon ımrujnə ruji bə dınyo məsihiyə dıvləton və milləton təbrik votışone.

İroni Rəşt şəhri Tolışi Rədio həm ımrujnə ruji, Həzrəte İsəbne Məryəm(ə) milad ruji ğeydiyati bə şəmə təbrik ərz kardedəmon.