Pars Today

İslami inğilabi yolə rəhbəri Həzrət ayətullah Xamenei votışe: İron və Venesolela muvəfəğə təcrubə nışonış doə Amerkə təziğon vədə səbarzəti yeqanə ro mığaviməte.

İslami inğilabi yolə rəhbəri Həzrət ayətullah Xamenei votışe: İron və Venesolela muvəfəğə təcrubə nışonış doə Amerkə təziğon vədə səbarzəti yeqanə ro mığaviməte.

Bə yolə rəhbəri məlumat ərosnə mərkəzi elani əsosi ironi islamiyə inğilabi yolə rəhbər Həzrət Ayətullah Xamenei zinə əsrə vaxti Venesoela prezdent Nikola Madoro və dəy həmro bə heyəti vindımonədə Amerkə qonə təziğon iyən  tərkibiyə canqi vədə İron və Venesoela mığavimətiku işarəş karde və votışe: 2 qılə məmləkəti mıvəfəğə təcrubə nışonış doə ım təziğon vədə mandeyu yeqanə ru mığaviməte.

Həzrət Ayətullah Xamenei eyne holədə  dəvardə soronədə bə İron İslam Respublika inkişafon iyən elmi və texnoloqiya inkişafon işarəş karde və votışe: ım yolə ğədəmon qıləy şərayetəndə peqətə bə ki həmməysə qon və təcrubə nıbə sanksiyaon iyən təziğon bə İroni milləti qi noə bə və Amerkəvıjon ıştən çəy nomışon maksimom təziğ  noəşone.

Yolə rəhbəri votışe: İroni milləti mığavimət bə maksimomə təziğon nomo bıə siyasəti  məğlobiyət bois bə jəqo ki Amerkə yolə siyasiyə məsul şəxsonku qıleni çan vaxt çimi bə nav çəyku rəsvoçiyə məğlobiyət unvanədə nomış barde.

Həzrət Ayətullah Xamenei İron və Venesoela miyonədə 20 sorə həmkoətion sənədon imza kardeku rozi mande və votışe: bland mıddətə həmkoətion lozim bə çion təşkil bə roziətion domo qəte və əvoni bə nəticə rosneye.

Yolə rəhbəri bə İron və Venesoela səmimiyə həmkoətion işarəş karde və votışe: 2 qılə məmləkət de heç məmləkət jıqo nezə rabitəşon ni və İron islam Respublika nışonış doə ki xətoə vaxtonədə xəto ğəbul kardedə və ıştə  duston dasi qətedə.

İroni İslamiyə inğilabi yolə rəhbəri eyne holədə Venesoela prezdenti bə sionist rejimi zid siyasətonku təclilış karde və votışe: çan vaxt çimi bə nav bə sionist rejimi zid şımə siyasəton iyən elan kardə nəzəron ve səhih və nıtars be.

Im vindımonədə  ki İron İslam Respublika prezdent sed İbrahim Rəisi həm huzurış hest bı Venesoela prezdent , Venesoela milləti de Amerkə saxtə mubarizədə İroni himoyəonku ğədrdanətiş karde və votışe: şımə bəvədə ki Venesoela şərayet ve saxt be və heç məmləkət komək kardə nıbı bəmə koməkın karde ta ə şərayetiku xaric bıbəmon.

Venesoela prezdent dəvardə soronədə bə ım məmləkəti ixtisadi saxtə şərayet işarəş karde və əlovəş karde Amerkəvıjon qıləy tədrici və çan cəhətə canqışon bə çəmə məmləkəti zid binoşon kardə əmmo əmə mığavimətımon karde və sanksiyaon çəmə extiyorədə noə fırsətonku istifadə kardeədə de Amerkə har cəhətinə hucumon mubarizəmon barde.

Madoro eyne holədə işarəş karde çəy məmləkət Fələstinı məsələ qıləy insoniyə mığəddəsə məsələ zındəy və votışe: həminə bovə xoto sionist rejim mosadı roədə mıtəmadiyə sorətədə bə Venesoela zid fitnəqərə hərəkəton domoədəy.