Bə İroni ərazi təmamiyyəti ehtırom noey zərruriyəti barədə Əmirəbdullahiyani təkid
İroni xarıci vəzir təkidış karde: İron İslom Respublika, İroni ərazi təmamiyyəti ehtırom noey zərrurətədə de hiç kəs zərıfətış ni.
Zinə şəv İroni xarıci vəzarətxonə vəzir Huseyn Əmirəbdullahiyan bə Fars dıyo həmkoəti şura iyən Çini mıştərəkə bəyoniyə iyən iddiooni ki 3curnə ləpəon ya cəzirəon yəni yolə tenb, qədə tenb iyən Əbomusa barədə bəyon bıə be ıştə Tvitterədə reaksiya nışoş do iyən nıvıştəşe: "Fars dıyoədə 3curnə ləpəon ya cəzirəon yəni yolə tenb, qədə tenb iyən Əbomusa İroni pokə sərzəmini co nıbıə baxşonin və bə çəmə millət iyən mihən əbədi surətədə məxsuse".
Fars dıyo kənoədə kişvəron yolon iyən Çin ıştə mıştərəkə oxonə bəyoniyədə İron və İ Bıə Ərəbə Əmirəti miyono 3curnə cəzirəon mıvzo sulhomiz surətədə həlli tələbışon kardə. Im qıləy holədəy ki ım 3curnə ləpəon İroni sərzəmini co nıbıə baxşonin.
Çini iyən Fars dıyo kənoədə kişvəron yolon bəyoniyə təcili co qılə bəyoniyə bəpeşt sadir bıə ki bəvədə Ərəbiston iyən Çini rəhbəron İroniku tələbışon kardə bin ki kişvəron daxıli koonədə mıdoxilə kardey vəy bıqəto.
