İron və Rusiyə prezidenton Moskvaədə de yandə mılağat kardən.

Bə İrib raporti əsos ım mılağat rəsmi mərasimon bəpeştə Kırımli Saraydə bərpo bıə.

Jıqo elan bəy ki muzakirəon bəpeştə Putin və Ruhani miyono siyasi, iğtisodi, puli, banki, nəğliyyat, şəhr soxte, rabitə texnoloqiyaon və enerji sahəonədə bıə təvafuğnoməon imzo bıə və qıləy oxonə bəyaniyə həm sadir be.

Ruhani və Putin dəvardə ço sori mıddətdə haşt kərə de yande mılağat kardəşon bən.

İron və Rusiyə miyono ticari miğdor bə 2 milyard dollar rəsə ki jıqo vote bəbe ki tojə həmkari sənədon karde bəzne ım miğdori bə 10 milyard dollar nızə bıkə-bırosni.

İroni prezident ğərore ki Rusiyədə de İronıjon həm mılağat bıkə.

Ağaye Ruhani ki pəynə bə Rusiyə daxil bıə de Rusiyə i minə vəzir Demitri Medvedev həm mılağatış kardə ijən ım mılağatdə bə İron və Rusiyə həmkarion inkişofi işorə karde bəpeştə votışe: omidımone de tojə səfəri bərobər siyasət, iğtisod, mədəniyət və co sahəonədə tojə fəslon oj bıbon.

Medvedev həm nəvuzə idi bə İroni prezident və millət təbrik votışe və de təkid karde bə İroni əhəmmiyət əlovəş karde: yəğin jıqonə çokə rabitəon bə həmkarion nığıləti komək bəkay.

Ağaye Ruhani çı Moskva dıvlətiyə universitədə həm suhbətış kardə.