Rusiyə və İroni prezident zinə Moskvaədə ıştə muzakirəon bəpeştə bo həmkarion hevuj kardero qıləy mıştərəkə bəyaniyə sadirışon kardə.

Bəyaniyədə 2 qılə kişvəri miyono muxtəlifə sahəonədə həmkarion tale ğeyd bıə ijən elan bıə ki detosə 2020 minə sori ticarət və sənayeədə çoknə İron və Rusiyə bə kəşə bıə planon bırəsin.

Bə həminə bəyaniyə əsos İron və Rusiyə əhdışon kardə ki bo stratejikə həmkarionro tojə ğədəmon peqəte bəpeştə səy bıkən ki çımiku vey məntəğə və beynəl xalğ sahədə həmkarion ziyod bıkən.

Həmçınin ım bəyaniyədə bə Suriyə istiğlol, vəhdət, hakımiyət və ərazi təmamiyyəti oqəte təkid bəy və 2 qılə kişvər ujnən de zumandəti Suriyə dıvləti və dovtələbə ğıvvom mubarizəonku terroristi qrupon və Daeşi məhv karde xoto tərəfdartişon kardə.

Moskva və Tehron ijən Yəmənədə canqi dəvom peydo kardeku ıştə niqəronəti elanışon kardə və pidəşon bən ki ım bohran siyasi cəhətiku həl bıbu.

İron və Rusiyə prezidenton mərkəzi Asiyadə bo sulh və stabilə vəziyəti zumand karde xoto həm bə həmkarion inkişof doe əv həm de məntəğə kişvəron bə i co təkidışon kardə.

Əmmo Putin və Doktor Ruhani zinə ruji mılağati cərəyonədə 14 qılə həmkari sənədon siyasi, iğtisadi, məhkəmə və huğuği iyən elmi-mədəni sahəonədə imzo bıən.

Həmçınin çandə həmkari sənədon həm co baxşonədə əcumlə: məhbuson vırə bə vırə karde, turist, elektrik, vəarzış, kə soxtə, ğətariyə xət, ətom enerji, nat, qaz, sərmoyə noe, ticarət, texnoloqiya və co sahəonədə bə imzo rəse.

İroni prezident Doktor Ruhani, zinə mılağati cərəyonədə təkidış kardə ki: İron və Rusiyə hədəf məntəğədə sulh və oromtətiye ijən Tehron və Moskva miyomo həmkarion bə hiç qılə kişvəri əleyh ni.

Əv votışe: İron və Rusiyə vey çokə təcrubəon de terrorizm mubarizə barədə ijən narkotika maddon əleyh bə dust vəardəşone ki çandə bə həmkarion inkişofi boiys bıə.

Putin həm İronış qıləy çokə hamsuyə və xatir cəmə şərik hisobış kardə və de işorə karde bə 2 qılə kişvəri miyono iğtisodi və ticari həmkarion İron və Rusiyə miyono əloğəon kantionış vey erjin hisobış kardə.