Pakistonədə terroriston lonə xərob karde çı İroni həxe.

İroni hərbiyə ğıvvon fərmondə muavin Qeneral Mayor Əhməd Reza Purdəstan votışe: əqə Pakistoni dıvlət bə terroristiyə qrupon zidd ciddiyə əməliyaton bino nıkə çın kişvəri zəminədə terroristiyə qrupon lonə vironə karde çı İroni həxe.

Bə Mehr aqentiyəti raporti əsos Qeneral Mayor Purdəstan təsdiğış kardə: Mircavə sərhədiyə məntəğədə terroristiyə hucum ijən İroni sərhədiyə Əsqəron jıqo bə i kərə şəhid karde qıləy hərbiyə muvəffəğiyət ni boçi ki bə sərhəddiyə protokolon əsos sərhəddi əmniyyəti kontrolkarde i baxş bə Pakistoni ohdəy və ım çəvon zəifəti əlomət dore.

İroni hərbiyə ğıvvon fərmondə canışin əlovəş kardə: İron i tərəf jıqonə əməliyaton məhkum kardedə və co tərəf hamsuyə kişvəronədə jıqonə bə İroni əleyh hərbiyə hərəkəton tov varde əzıni boçi ki İron ıştə əraziədə əmniyyəti təmin karde xoto de hiç kəsi zərfətış ni və Pakistonədə terroriston lonə viron kardeyo ıştə həx zendə.

Ğeyd bıkəmon ki dəvardə manqi 26 ədə Ceyş Ələdl nomo bıə terroristiyə qrupi uzvon İroni Sistan-Bəluçiston ostani Mircave nomo bıə sərhəddiyə məntəğədə bə i kərə İroni 9 qılə sərhəddiyə Əsqəronışon şəhid kardən və i qılə zəxmin bıə Əsqəri bə qiro peqətışone.