Ərağçi iyən Baru miyono sıhbəton
İron iyən Fransa xarici koon vəziron telefonə qəpışon jə.
Fransa xarici koon vəzir Jan Noel Baru iyən İroni İslomi Respublikə xarici koon vəzir Seyd Əbbos Ərağçi çe Ğərbi Asiyə oxonə hodisəon iyən çı amerkə iyən sehyonist rejimi bə İroni ələyh hərbi təcovuzi əmniyyəti iyən ixtisodi nəticəon barədə bıə qıləy telefonə təmosədə votemon iyən nəzə mıbodiləşon kardə.İroni xarici koon vəzir bın dəvardə i manqi dırozi çe amerkə iyən sehyonist rejimi bə İroni ələyh hərbi təcovuzədə mırtəkib bıə cinoyəton şərh doə holədə,çı Avropə bəzi kişfəron sırfən çın canqi ixtisodi nəticəon barədə bıə çəvon niqəronətiyon ibroz kardə mevğeyon iyən çəvon bə İroni mərdumi ələyh vəhşiyonə hərbi təcovuzi nisbətədə bıə sukut ixtiyor kardeyış de şiddəti tənğıdış karde.İroni xarici koon vəzir məntəğədə bə amerkəvıjə təcovuzkoron ələyh mıdofiyə əməliyyoton dəvomi dəlilış,min cumlə bəçəvon çı məntəğə kişfəron əraziyonədə bıə hərbi imkonaton iyən bazəon ələyh həmləon şərh doə holədə,təkid iyən elonış karde:İroni məntəğədə bə təcovuzkoron ələyh mıdofiyə əməliyyoton dəvomi dəlil,amerkə bın kişfəron əraziyonədə bıə hərbi imkonaton iyən bazəonku bə İroni mərdumi ələyh ğeyri-ğanuni canqi xoto istifodə kardeye.Ərağçi təkidış kardə ki,Hormozi tanqədə bıə noəmnəti əsliyə mənşə,çe amerkə iyən sehyonist rejimi bə İroni ələyh hərbi təcovuze.Əy əlovəş kardə:Im ovə roon bə İroni ələyh hərbi təcovuz kardə tərəfon kəştiyon dimi bastə bıə və ın ğərol bə beynəlxalğə normaon iyən çe təcovuzkorə tərəfon bə İroni ələyh ğeyri-ğanuni hərbi təcovuzədə çe Hormozi tanqəku suyi-istifodə kardey xoto bekardə bıə.eyni holədə bə sayir kişfəron məxsus kəştiyon şey-omey,de İroni səlohiyyətinə orqanon koordinasiyə iyən həmohənq kardə holədə əncom doey beydə. İroni İslomi Respublikə xarici koon vəziri təkidış kardə ki, de Hormozi tanqə vəzyəti əloğədor çe təcovuzkoron iyən çəvon himoyədoron tərəfiku min cumlə İMT Əmniyyət Şuradə harcurnə təhrikamizə hərəkət vəzyəti həni həm mırəkkəb bəkarde.Fransa xarici koon vəzir həm bə İroni ələyh hərbi təcovuzi iyən ğeyri-hərbi hədəfon bombardımon kardeyədə bəştə kişfəri mıxolifətinə mevğey təkidış kardə.
