Bə terroriston əleyh mubarizə və əməliyaton dəvom doe xoto İron və Rusiyə ciddiyə iradəon.
İron və Rusiyə mudafiə vəziron miyono telefoniyə rabitədə Suriyədə oxonə şərayeti bəyon karde bəpeştə 2 tərəf bə həmkarion ijən səy və cəhdon dəvom doe terroristiyə qrupon məhv kardero təkidışon kardə.
Bə İrna raporti əsos Qeneral Mayor Dehğan, İroni mudafiə vəzir ım telefoniyə votımonədə Amerkə bə Suriyə Əlşoirat nomo bıə hərbiyə baza təcavoz və hucum karde işorəş kardə ijən votışe: ım təcavoz Suriyədə məğlub bıə terroriston rohiyə zumand kardero əncom bıə.
Qeneral Mayor Dehğan çı Amerkə jıqonə təcavozon co qılə hədəfonış, Amerkə siyasi meydonədə Trampi xərob bıə sima və obrazi çok nışo doe ijən çın kişvərədə bıə daxıliyə bohranonku umumi iştimaiyəti fikon mınhərif karde zınəş bıə.
İroni mudafiə vəzir ijən terroriston məğlubi nışonəon oşkor bey bəpeştə bə Amerkə mıştərək və vey xətərnakə planon məntəğədə qılə pesoxtə bıə icmaonku istifodə karde işorəş kardə ki çəy hədəf bə Suriyə ğanuniyə dıvləti zidd siyasəton dəvom doe ijən məntəğədə Amerkə hərbiyə huzuri tocih əkə heste.
Dehğan təkidış kardə: çı Amerkə tojə hakimon deştə həminə bombardımoni sabitışon kardə ki ne ın ki de terrorizm mubarizə barəde pidəşon ni bəlkəm əvoni zumand karde və bəvon rohiyə doe sahədə ko kardən.
Rusiyə mudafiə vəzir Serqey Şoyqo həm ım votımonədə İroni mudafiə vəziri vindemonış təsdiğ kardə ijən pidəş bıə ki de terrorizm mubarizə bardero vey rə Suriyədə bə hərbion və dovtələbə ğıvvon komək bıbu.
Serqey Şoyqo votışe: Rusiyə vey ciddi pidəşe deştə siyasi və hərbiyə zərfiyəton çımiku vey bə terroriston zumandə zərbə varid bıkə ijən meydoni bo terroristi himoyə əkəyon çətin və tanq bıkə.
