Məhərrəm,Huseyni manq-7
Məhərrəm,Huseyni manq-7
İbodət iyən nımoj İlahi dinon məxsusə cilvəonkuye.həzrət İbreym(ə) ıştə dıvoədə Xıdovəndiku tələb kardedə ki,çəy jimoni həmro iyən fərzəndi nımojəvotonku ğərol bıdo.bə Kərimə-Ğıroni ayəon əsos həzrət İsa-Məsih(ə) həm mukəlləf be ki,çanədə ki,bəyjiye,nımoji iğomə iyən bərpoko.Məcidə-Ğıron nımoji çe imoni nışonəonku təğdım kardedə və rəvoyətonədə həm əv bənə çe dini sutuni unvoni elon kardey bıə.bəçəy xoto,çe Aşurə inğılobi həmməysə ğəşənqə cilvəonku bə nımoji əhəmiyyət doey,əv həm çəy sıftənə vaxtədə ki,İmom Huseyn(ə) əvış Aşurə ruji zuhri zəmonədə bə nımoyiş noşe.İmom Huseyn(ə) bənə çe xeyməon kəno xəndəxon kandey,ıştə əshobi imtovon kardey,silohon hozzı kardey iyən xeyməon iyande kəno ğərol doey bıə canqi tədbiron vindey kəno,ibodətış ıştə koon sərlovhəş ğərol doe iyən əmələdə həm de zikr,mınocot və de Ğıroni tilovəti koy məşğul be.Seyd ibn Tavus votedə:”İmom Huseyn(ə) iyən çə həzrəti əshob Aşurə şəvış bə sıbi rosneşone,qıləy holədə bənə meşi bızanqi kandu çəvonku zumzumə bə quşon rəseydəbe.i dastə ruku holədə iyən i dastə həm səjdə holədə bin.i qrup ğıyomi holədə i qrup həm nıştəco”.
Çunki,nımoj çe qıno iyən bədə koonku odəmi oqəteydə iyən insoni bə çokə sıfəton tammə məzhər iyən simvoli nez kardedə,Aşurə ruji zuhri zəmonədə İmom Huseyn(ə)deçəy iğomə iyən bərpo kardey,bə yodış dənoe ki,İslomə dini mıdofiyə iyən cihodədə çe istiğoməti ruf, poydoərəti iyən sabit mandey həm,nımojədə iyən de Xıdo irtibotədə noey bıə və bəpe çəyku ğıvvə sıey bıbu.joqo ki,Xıdovəndi hamyəşe:”çe səbr iyən nımojiku koməq tələbkənən”.(Bəğərə 45)...
